თუ დეპუტატებს გორის ჰოსპიტალში არ შეუშვებენ, მიხეილ სააკაშვილი სამედიცინო მომსახურებაზე უარს იტყვის - ადვოკატი
გამოქვეყნდა:
ჩვენთან ერთად მოიპოვეთ თავისუფლება!
ქართველი ხალხის აქტიურობა, ქართველი ხალხის პროტესტი არის საფუძველი მიხეილ სააკაშვილის გათავისუფლების- აცხადებს მისი ადვოკატი ბექა ბასილაია გორის ჰოსპიტალიდან გამოსვლის შემდეგ.
მაინ მიხეილ სააკაშვილის გათავისუფლების საინიციატივო ჯგუფის შესახებ ისაუბრა და თქვა, რომ მასში ის ხალხი შევლენ, ვინც აქტიურობდა მისი სიცოცხლის გადარჩენის პროცესში
"სასამართლო იმ პირობებში დღეს რაშიც იმყოფება, ივანიშვილის დიქტატის ქვეშ მოქმედი სასმართლო, მიხეილ სააკაშვილს არ გაათავისუფლებს. აქედან გამომდინარე გადამწყვეტი მნიშვნელობა აქვს ქართველი ხალხის აქტიურობას, ქართველი ხალხის პროტესტს და ამ პროტესტის ფონზე, ხელისუფლებას მოუწევს პოლიტიკური გადაწყვეტილების მიღება, რომ შეწყვიტოს პოლიტიკურად მოტივირებული დევნა და პოლიტიკური შურისძიება" - ამბობს ბასილაია.
ადვოკატის თქმით, მიხეილ სააკაშვილთან შეხვედრის საშუალება არ ეძლევათ დეპუტატებს, რისი უფლებაც დეპუტატებს აქვთ
"ბოლო დღეების მანძილზე არ ეძლევათ დეპუტატებს მიხეილ სააკაშვილს შეხვდნენ. ეს არის პოლიტიკური იზოლაციის პროცესი მიხეილ სააკაშვილის მხრიდან. ეს არის მიხეილ სააკაშვილისთვის ხელის შეშლის პროცესი" - ამბობს ბასილაია.
ამ ყველაფრის გამო, მესამე პრეზიდენტი ერთგვარ ულტიმატუმს აყენებს. იმ შემთხვევაში, თუ მასთან დეპუტატებს არ შეუშვებენ, მიხეილ სააკაშვილი უარს იტყვის სამედიცინო მომსახურებაზე და მიიღებს იმ მედიკამენტებს, რომლებსაც ის რუსთავის ციხეში იღებდა:
"მიხეილ სააკაშვილს აქვს ძალიან მკაფიო პოზიცია, თუ ეს გაგრძელდება, და თუ ამას დაუყოვნებლივ არ დაესმევა წერტილი, ის გორის ჰოსპიტალში მიმდინარე მკურნალობის პროცესს შეწყვეტს და მიიღებს მხოლოდ იმ მედიკამენტებს, რასაც იღებდა მანამდეც, დანიშნულებით, ვიდრე საქართველოში ჩამოვიდოდა" ამბობს ბასილაია.
