ჩვენთან ერთად მოიპოვეთ თავისუფლება!
აზარტულ თამაშებში მონაწილეობა, ჯამში, 1 მილიონამდე სრულწლოვან ადამიანს აეკრძალება - ამის შესახებ პრემიერმა ღარიბაშვილმა მთავრობის სხდომაზე ისაუბრა და განმარტა, რას გულისხმობს მთავრობის მიერ ინიცირებული რეგულაციები:
„ონლაინ სათამაშო ბიზნესისთვის გათვალისწინებული იქნება ახალი საგადასახადო დაბეგვრის მექანიზმის შემოღება და ჯამურად, სექტორის გადასახადების დასაბეგრი ბაზა გაიზრდება 65-70%-ით.
მეორე საკითხი - ასაკობრივი ზღვარი - 25 წლამდე აეკრძალება აზარტულ თამაშებში მონაწილეობის მიღება ჩვენს მოქალაქეებს და აქაც, გაწერილი გვაქვს დეტალურად, თუ ვის შეეხება აღნიშნული შეზღუდვა - ესენი არიან სოციალურად დაუცველი პირები, რომლებიც დახმარებას იღებენ სახელმწიფოსგან, საჯარო მოხელეები, პირები, რომლებიც მიმართავენ შემოსავლების სამსახურს თვითშეზღუდვის მექანიზმის გამოყენების მოთხოვნით და ასევე პირები, რომლებიც მოხვდებიან ე.წ. შავ სიაში სასამართლო გადაწყვეტილების საფუძველზე, ოჯახის წევრების მოთხოვნით და ჯამში, პირთა წრე, რომელთაც შეზღუდული ექნება წვდომა აზარტულ თამაშებზე, შეადგენს 1 მილიონამდე სრულწლოვან ადამიანს. რაც შეეხება კონტროლის მექანიზმებს, აქაც კარგად გვაქვს გაწერილი შესაბამისი მექანიზმები.
მესამე საკითხი - რეკლამის შეზღუდვა - აიკრძალება სათამაშო ბიზნესის ყველანაირი სატელევიზიო რეკლამა, ასევე გარე რეკლამა და ქართულ ვებ-გვერდებზე რეკლამის განთავსება. სათამაშო ბიზნესის ოპერატორებისთვის დასაშვები იქნება მხოლოდ სპონსორობის ხელშეკრულების გაფორმება და ძირითადად შეიძლება სპორტს შეეხოს აღნიშნული დაშვება“, - თქვა ღარიბაშვილმა
ღარიბაშვილის თქმით, რეგულაცია შეეხება ფარმაცევტულ ბაზარსაც და რეგულაციებთან დაკავშირებით საკანონმდებლო ინიციატივა პარლამენტს დეკემბერში წარედგინება.
„დაპირებისამებრ, აქტიურად ვმუშაობთ, ჯანდაცვის მინისტრი მუშაობს ფარმაცევტული ბაზრის რეგულაციებზე. შესაბამისი საკანონმდებლო ინიციატივა, კანონპროექტი დეკემბერში იქნება წარდგენილი პარლამენტში. ასეთია ჩვენი სურვილი და ჩვენ, რა თქმა უნდა, პარლამენტთან ერთად, ინტენსიურად ვიმუშავებთ ამ საკითხზე“, - ამბობს ირაკლი ღარიბაშვილი.
გარდა ამისა, მთავრობის გადაწყვეტილებით, იწყება საპარტნიორო ფონდის რეფორმა, კერძოდ, მოხდება ფონდის რესტრუქტურიზაცია და შესაბამისი საკანონმდებლო ცვლილებები პარლამენტში დეკემბერში დარეგისტრირდება.
„ოქტომბრის ეკონომიკური ზრდის პროგნოზი არის 7%-მდე, რაც ჯამში 10 თვეში 10,5% გამოდის. ეს მართლაც უნიკალური, უპრეცედენტო ზრდაა მთელ რეგიონში და არა თუ რეგიონში, მთელ ევროპაში“, - აღნიშნა ირაკლი ღარიბაშვილმა.
ცნობისთვის, ახალი რეგულაციები ღარიბაშვილმა მთავრობის სხდომაზე დააანონსა.
