ბიძინა კულუმბეგოვი მიიჩნევს, რომ მწვანე პასპორტები ტრანსპორტშიც უნდა მოქმედებდეს
გამოქვეყნდა:
ალერგოლოგ-იმუნოლოგი ბიძინა კულუმბეგოვი თვლის, რომ მწვანე პასპორტი ტრანსპორტშიც უნდა მოქმედებდეს. მისი თქმით, მწვანე პასპორტები შესაძლებლობას იძლევა, რომ ვირუსის გავრცელება მეტად გაკონტროლდეს, თუმცა მისი მოქმედების არეალი უნდა გაფართოვდეს.
"ერთი მხრივ, მწვანე პასპორტები, რომელიც დღეს ამოქმედდა, გვაძლევს იმის იმედს, რომ იმ სივრცეებში, სადაც ინფექცია ყველაზე ხშირად ტრიალებს და გენერირდება, უფრო მეტად იქნება გაკონტროლებული, თუმცა ვისურვებდი, რომ მწვანე პასპორტების მოქმედების არეალი უფრო ფართო იყოს. ის იყოს საზოგადოებრივ ტრანსპორტში, ასევე მოეთხოვებოდეს იქ დასაქმებულ ადამიანებს, სადაც არის კვების ობიექტები, თუნდაც მაღაზიები და ა.შ. ამიტომ, ვფიქრობ, ეს იქნება შემდგომი ნაბიჯი, რადგან სხვანაირად ეპიდემიაზე მწვანე პასპორტების გავლენა ისეთი თვალსაჩინო ვერ იქნება…საზოგადოებრივ ტრანსპორტზე ალბათ უნდა გავრცელდეს. მესმის, რომ ამას შეიძლება, ტექნიკური სირთულე ახლდეს თან. არ არის აუცილებელი, ამაზე ყველა მგზავრი იყოს შემოწმებული, უბრალოდ ადამიანებს უნდა ვუთხრათ, რომ ჩვენ ტრანსპორტში დავუშვებთ მხოლოდ მწვანე პასპორტის მქონე მოქალაქეებს, ამიტომ, რაც უფრო სწრაფად განხორციელდება ეს, ეპიდემიოლოგურ სიტუაციას წაადგება", - თქვა კულუმბეგოვმა პირველ არხთან.
ცნობისთვის, კოვიდპასპორტების სისტემა საქართველოში 1-ლი დეკემბრიდან ამოქმედდა.
მოქალაქეს მწვანე სტატუსი მიენიჭება იმ შემთხვევაში თუ ის აკმაყოფილებდეს შემდეგი კრიტერიუმებიდან ერთ-ერთს:
- არის სრულად ვაქცინირებული;
- გადატანილი აქვს Covid-19 და ვირუსის დადასტურებიდან გასულია 14 დღე;
- ჩატარებული აქვს 72-საათიანი ვალიდურობის PCR ტესტი;
- ჩატარებული აქვს 24-საათიანი ვალიდურობის ანტიგენ ტესტი.
იხილეთ ასევე:
