თუ რუსული ჯარი გადავა უკრაინის ტერიტორიაზე, მას გაეცემა სწრაფი და მტკიცე პასუხი აშშ-ის მხრიდან - ბლინკენი
გამოქვეყნდა:
ისტორიული შეხვედრა ჟენევაში კონკრეტული შედეგის გარეშე დასრულდა. რუსეთი და შეერთებული შტატები უკრაინის კრიზისის მოგვარების გზებს სხვადასხვაგვარად ხედავენ. ორი ქვეყნის პირველი დიპლომატების აუდიენცია ოფიციალური მოსკოვის ულტიმატუმით გაიხსნა.
აშშ-ის სახელმწიფო მდივანი ენტონი ბლინკენი კი ლავროვთან შეხვედრის შემდეგ ამბობს, რომ საუბარი გულწრფელი და პირდაპირი იყო. მისივე თქმით, თუ რუსული ჯარი უკრაინის ტერიტორიაზე გადავა, ეს ახალი აგრესია იქნება, რომელსაც აშშ-ის მხრიდან სწრაფი და მტკიცე პასუხი გაეცემა.
საუბარი იყო გულწრფელი და პირდაპირი. მე გადავეცი მას ვაშინგტონისა და ჩვენი პარტნიორების პოზიცია, რომ ჩვენ მტკიცედ ვდგავართ უკრაინის სუვერენიტეტისა და ტერიტორიული მთლიანობის მხარდაჭერის საქმეში. ჩვენ ნათლად დავაფიქსირეთ, რომ თუ რუსული ჯარი გადავა უკრაინის ტერიტორიაზე, ეს იქნება ახალი აგრესია და მას გაეცემა სწრაფი და მტკიცე პასუხი ამერიკის შეერთებული შტატებისგან და ჩვენი მოკავშირეებისგან.
ჩვენ ასევე ვიცით, რომ რუსეთს შეუძლია, აგრესიის ისეთი ფორმები გამოიყენოს, რომელიც არ გულისხმობს ღიად სამხედრო ძალის შეყვანას სხვა ქვეყნის ტერიტორიაზე. ასეთ ქმედებებსაც ჩვენ ვუპასუხებთ ერთსულოვნად და მტკიცედ. მე ველაპარაკე უკრაინის პრეზიდენტსა და საგარეო საქმეთა მინისტრს, ასევე, ბერლინში შევხვდი მოკავშირეებს, მათ შორის კანცლერ შოლტს. გვსურს, რომ ყველა სახის წინააღმდეგობა გადავჭრათ დიალოგისა და დიპლომატიის გზით.
მაგრამ ასევე შეგვიძლია პასუხი გავცეთ რუსეთს, თუ ის აგრესიისა და კონფლიქტის გზას აირჩევს. მე ასევე ვუთხარი ლავროვს, რომ რაც შეეხება რუსეთის მიერ წარმოდგენილ შეშფოთებებს უსაფრთხოებასთან დაკავშირებით, ჩვენ მზად ვართ, ყველა მასალა განვიხილოთ და ველით რუსეთისგან საპასუხო ნაბიჯებსაც, რაც იმას ნიშნავს, რომ რუსეთმაც უნდა გაითვალისწინოს ჩვენი შეშფოთებები, - ამბობს ბლინკენი.
