"გაგვეცალოს ივანიშვილი, სანამ ღმერთის და ხალხის რისხვა თავს დასცემია" - ერგნეთში მოსახლეობამ ვაშლის ბაღების გაჩეხვა დაიწყო

"ქართული ოცნების" მიერ საოკუპაციო ხაზთან მიტოვებული მოსახლეობა და შეჩერებული დახმარებები - ოკუპირებული ცხინვალის მოსაზღვრე სოფელ ერგნეთში, ადგილობრივებმა ვაშლის ბაღების გაჩეხვა დაიწყეს.

მოსახლეობა ხილის ბაღებს ორი მიზეზით ჩეხავს. ერთი მიზეზი ისაა, რომ გამოსაზამთრებლად საჭირო 200-ლარიანი ვაუჩერები ხელისუფლებამ ამ წელს მათ აღარ დაურიგა. მეორე მიზეზი კი ხილის ფასია, რომელიც მინიმუმზეა დასული.

მძიმე სოციალური და ეკონომიკური პირობების გამო, მოსახლეობას მოსავალი ვეღარ მოჰყავს, სწორედ ამიტომ გადაწყვიტეს, გაჩეხონ ხილის ბაღები და ზამთარში გათბობა მაინც შეძლონ.

ადგილობრივები ხელისუფლებას და ბიძინა ივანიშვილს მოუწოდებენ, დათმონ ძალაუფლება, რადგან მათივე თქმით, "ქართულ ოცნებას" ქვეყნის მართვა არ შეუძლია.

"ქვეყანას როგორ გაუჭირვეს, ხალხი ვაშლს ვერ ყიდულობს, პურს ვერ ყიდულობს და ვის რად უნდა შენი ვაშლი. ქვეყანაში არის მძიმე ეკონომიკური და პოლიტიკური ვითარება შექმნილი. ბიძინა ივანიშვილს ვეტყოდი ერთ რაღაცას, გაგვეცლოს, სანამ ღმერთის და ხალხის რისხვა თავს დასცემია. ხომ ხედავენ, რომ ვერ მართავენ ქვეყანას, ან არ მართავენ. რით ვერ გაძღნენ, დაანებონ ხალხს თავი! რა დაუშავა ქართველმა ერმა ბიძინა ივანიშვილს ასეთი, რომ ესეთ დღეში ჩააგდო ქვეყანა", - ამბობს ერთ-ერთი ადგილობრივი.

ასეთივე მდგომარეობაა გამყოფ ხაზთან მდებარე სხვა სოფლებშიც, სადაც მოსახლეობის მდგომარეობა სულ უფრო მეტად მძიმდება. ადგილობრივები წლებია, ხელისუფლებას დახმარებას სთხოვენ, თუმცა უშედეგოდ.