მოლაპარაკება საერთო მაჟორიტარებზე - ოპოზიცია კანდიდატებს, სავარაუდოდ, 20 ივნისამდე წარადგენს

როგორ შეთანხმდება ოპოზიცია თბილისში ერთიან მაჟორიტარ კანდიდატებზე? ამ დრომდე, პარტიებს შორის აქტიური მოლაპარაკებები მიმდინარეობს. ცნობილია, რომ "ერთიანი ნაციონალური მოძრაობა" დედაქალაქში სახელისუფლებო კანდიდატთან მხოლოდ ორ ოქლში - სამგორსა და ისანში იბრძოლებს. დანარჩენ ექვს სამაჟორიტარო ოლქში კი ადგილები ამ დრომდე ვაკანტურია. ოპოზიცია კონსულტაციების დეტალებს მკაცრად ასაიდუმლოებს.

გრიგოლ ვაშაძემ ნიკა გვარამიას "მთავარ აქცენტებში" ბალანსის დაცვის აუცილებლობაზე ისაუბრა. "ნაციონალური მოძრაობის" ლიდერის თქმით, სამგორსა და გლდანში ნაციონალური მოძრაობა მხოლოდ თავისი პარტიული კვოტით იასპარეზებს და შეთანხმებაში გაერთიანებულ ოპოზიციაში შემავალი სხვა პარტიები არ განიხილებიან.

"ნაციონალური მოძრაობის" ლიდერის ამ განცხადებას მალევე გამოეხმაურა "ევროპული საქართველო". გიგა ბოკერიას თქმით, რვა სამაჟორიტარო ოლქიდან "ნაციონალური მოძრაობის" ორ კვოტაში გაერთიანებულ ოპოზიციაში შემავალი სხვა პარტიებიც იგულისხმებოდნენ და დარჩენილ ექვს ვაკანტურ ოლქში პოლიტიკური გაერთიანება „ძალა ერთობაშია“ არ განიხილება.

მიუხედავად ამისა, დღეს გიორგი ვაშაძე დარწმუნებით საუბრობდა, რომ მისი პარტია ექვსი ვაკანტური მაჟორიტარული ოლქიდან ერთერთში გამარჯვებისთვის იბრძოლებს. 

კიდევ ერთი კანდიდატი, ვინც შესაძლოა ერთიანი ოპოზიციის მხარდაჭერით თბილისში მაჟორიტარობისთვის იბრძოლოს, ეკა ბესელიაა. „პარტია სამართლიანობისთვის“ ლიდერმა "მთავართან" საუბარში დაადასტურა, რომ ოპოზიციის ნაწილთან ის აქტიურ კონსულტაციებს მართავს და თბილისში მაჟორიტარობისთვის  მზადაა.

თბილისში პოლიტიკურ ასპარეზს დანარჩენ ოპოზიციას უთმობს ნინო ბურჯანაძე. "დემოკრატიული მოძრაობის" ლიდერი "ლეიბორისტული პარტიის" ოფისში კონსულტაციებზე მონაწილეობას აქტიურად განაგრძობს, თუმცა თვლის, რომ მისმა პარტიამ აქცენტი პროპორციულ სიაზე უნდა გააკეთოს და მაჟორიტარობაზე მხოლოდ რეგიონების ნაწილში იბრძოლოს.

ექვსი მაჟორიტარული ოლქის გადანაწილება 30-მდე პარტიამ უნდა შეძლოს. კონსულტაციების დეტალები ამ დრომდე გასაიდუმლოებულია. "მთავარის" ინფორმაციით, პოლიტიკურმა პარტიებმა თბილისში რვავე კანდიდატი 20 ივნისამდე უნდა წარადგინონ.