მოვუწოდებთ ხელისუფლებას, მიიღოს ყველა ზომა, რომ საარჩევნო სისტემის ცვლილების მიღება რისკის წინაშე არ დადგეს - NGO-ები

არასამთავრობო ორგანიზაციები საპარლამენტო პარტიებს ერთობლივი განცხადებით მიმართავენ და საარჩევნო სისტემის ცვლილების მხარდაჭერისკენ მოუწოდებენ.

მესამე სექტორის განცხადებაში ნათქვამია, რომ 8 მარტის შეთანხმება საარჩევნო სისტემის ცვლილებაზე, იდეალური არ არის, თუმცა მნიშვნელოვანი ძალისხმევის შედეგია, რომელშიც დიდი წვლილი აქვთ შეტანილი საერთაშორისო პარტნიორებს:

შეთანხმებული ვერსია არ არის იდეალური, ვინაიდან არ ითვალისწინებს 2020 წლის საპარლამენტო არჩევნებისთვის სრულად პროპორციულ სისტემაზე გადასვლას. მიუხედავად ამისა, არსებული რეალობის გათვალისწინებით, 120 პროპორციული და 30 მაჟორიტარული მანდატის შერეული სისტემა წინგადადგმული ნაბიჯია მნიშვნელოვნად ზრდის რა პროპორციული საარჩევნო სისტემით გასანაწილებელი მანდატების რაოდენობას დღეს მოქმედ სისტემასთან შედარებით. ე.წ. 120/30 მოდელი საკანონმდებლო ორგანოში ამომრჩეველთა ხმების უფრო სამართლიანად და პროპორციულად ასახვის შესაძლებლობას იძლევა, რაც თავის მხრივ ხელს შეუწყობს პლურალისტური, მრავალპარტიული პარლამენტის ჩამოყალიბებას და ქვეყანაში დემოკრატიის ხარისხის გაუმჯობესებას." - აცხადებენ არასამთავრობო ორგანიზაციები.

მათივე თქმით, "ქართულოი ოცნების" მიერ, საარჩევნო სისტემის ჩაგდებამ ერთხელ უკვე შეიყვანა პოლიტიკური პროცესები ჩიხში და ხელისუფლებას მოუწოდებენ ამჯერად მაინც მიიღონ ყველა ზომა იმისთვის, რომ საარჩევნო სისტემის ცვლილების მიღება რისკის წინაშე არ დადგეს. 

განცხადებაში აღნიშულია, რომ 8 მარტის შეთანხმება სრულად არ შესრულებულა, თუმცა არასამთავრობოები საარჩევნო ცვლილების მხარდაჭერისკენ ოპოზიციასაც მოუწოდებენ: 

საარჩევნო სისტემის ცვლილება არ არის მხოლოდ ერთი რომელიმე პოლიტიკური სუბიექტის ინტერესი, ის ემსახურება საქართველოს მოსახლეობის ინტერესებს, იცხოვრონ უფრო დემოკრატიულ და სტაბილურ ქვეყანაში. სამართლიანი საარჩევნო სისტემა ქვეყნის წინაშე არსებული გამოწვევების გადალახვისა და რეფორმების განხორციელების გზაზე არა ერთადერთი, მაგრამ მნიშვნელოვანი წინაპირობაა. გასული წლის ნოემბრის თვეში მმართველი პარტიის მიერ საარჩევნო სისტემის ცვლილების ჩაგდებამ ერთხელ უკვე შეიყვანა ჩიხში პოლიტიკური პროცესი. მნიშვნელოვანია, რომ ამჯერად მაინც, როგორც მმართველი პარტია, ისე ოპოზიცია მაღალი პასუხისმგებლობით მოეკიდონ საარჩევნო სისტემის ცვლილების საკითხს. მოვუწოდებთ ხელისუფლებას ყველა ზომა მიიღოს, რომ საარჩევნო სისტემაზე ცვლილებების მიღება რისკის წინაშე არ დადგეს. მიუხედავად იმისა, რომ გვესმის და ვიზიარებთ პოლიტიკური პარტიების ნაწილის წუხილს 8 მარტის შეთანხმების სრულყოფილად შეუსრულებლობის გამო, მოვუწოდებთ ყველა საპარლამენტო პარტიას, მხარი დაუჭირონ საკონსტიტუციო ცვლილებების მიღებას“, - ნათქვამია განცხადებაში, რომელსაც 6 არასამთავრობო ორგანიზაცია აწერს ხელს.