ომი რომ დაიწყო ეს უკვე დამარცხებაა, ყველაფერი უნდა გაეკეთებინათ, რომ ეს არ შემდგარიყო - ელისო ბოლქვაძე
გამოქვეყნდა:
"ქართული ოცნების" დეპუტატისა და იუნესკოს მშვიდობის ელჩის, ელისო ბოლქვაძის თქმით, ის რომ უკრაინაში ომი დაიწყო უკვე "დამარცხებაა" და "ყველაფერი უნდა გაეკეთებინათ" იმისთვის, რომ ომი არ დაწყებულიყო.
განცხადება ბოლქვაძემ კომიტეტის სხდომაზე გააკეთა. ლელოს წევრმა, დეა მეტრეველმა მას უკრაინასთან დაკავშირებით შეკითხვა დაუსვა.
"დღიდან, რაც ეს უბედურება დაიწყო უკრაინაში, ყოველ დღე სისხლის მიცემიდან დაწყებული, თუ საერთაშორისო და საპარლამენტო განცხადებები, ყველა პლატფორმა გამოყენებული გვაქვს. მე პირადად ფული მაქვს შეგროვებული იმისთვის, რომ სისხლი წასულიყო უკრაინაში. ასევე, ჩვენ პარლამენტის თავმჯდომარესთან ერთად მივედით და მოვინახულეთ ქალები, ბავშვები, ლტოლვილები და ა.შ. ასე რომ, არაერთ საჯარო, საერთო მიმართულებებში მე ჩავერთე. ეს არის უბედურება, რასაც ჩვენ ვუსმენთ და ვუყურებთ. ამდენი ბავშვი და ამდენი ადამიანი იღუპება. ეს არის საშინელი ტრაგედია და ამაზე მე საჯაროდ მაქვს ძალიან მწვავე რეაქცია იმ ადამიანებზე, ვისაც უნდათ, ეს გამოიყენონ, როგორც მასალა იმისთვის, რომ ვიღაცა ვიღაცას დააპირისპირონ.
ომი უკვე უბედურებაა, რომ დაიწყო ომი, ეს უკვე დამარცხებაა, იმიტომ, რომ ომი არ უნდა იყოს, ჩემი აზრი თუ გაინტერესებთ, ყველაფერი უნდა გაეკეთებინათ იმისთვის, რომ ეს ომი არ შემდგარიყო, მაგრამ შედგა და ახლა უბედურებაში არის და ამას ყველა ვუყურებთ",-თქვა ბოლქვაძემ.
ლელოს დეპუტატის კითხვაზე, არის თუ არა ეს უკრაინის დამარცხება, ბოლქვაძეს არ განუმარტავს თუ ვის გულისხმობადა და თქვა:
"იდეური დამარცხებაა, იმის, რომ ამდენი ადამიანი ნადგურდება, არ უნდა მისულიყო აქამდე, არსებობს მოლაპარაკებები. ვთვლი, რომ ომი არის უბედურება",- თქვა ოცნების დეპუტატმა.
