რუსული სპეცრაზმის ნაწილმა, რომელიც სირიაში იბრძოდა, უარი თქვა მარიუპოლის შტურმში მონაწილეობაზე - უკრაინა
გამოქვეყნდა:
რუსული სპეცრაზმის ნაწილმა, რომელიც სირიაში, საბრძოლო მოქმედებებში მონაწილეობდა, უარი თქვა მარიუპოლის შტურმში მონაწილეობის მიღებაზე - ამის შესახებ ინფორმაციას უკრაინის შეიარაღებული ძალები ავრცელებს.
მათი ინფორმაციით, 2-დან 4 აპრილამდე, ამ დანაყოფმა დაახლოებით 30 სამხედრო მოსამსახურე დაკარგა.
გარდა ამისა, ქალაქ ეკატერინბურგში, რუსულ არმიასთან კონტრაქტის გაფორმებას, რეზერვში მყოფი მოქალაქეების 1%-ზე ნაკლები დათანხმდა.
"397 კანდიდატიდან გასაუბრებაზე მხოლოდ 2 დათანხმდა. უარი თქვა - 52-მა, არ დაუკავშირდა - 203, 140 კანდიდატზე მუშაობა მიმდინარეობს"- წერს უკრაინის ოფიციალური უწყება.
ასევე, მათი ინფორმაციით, უკიდურესად დაბალია უკვე მობილიზებულთა მოტივაციაც. 7 მარტს ნოვოიდარის პოლიკლინიკიდან ლუგანსკის მიმართულებით გაიგზავნა ორი ავტობუსი, დაჭრილი რუსი სამხედროებით, რომელთა უმრავლესობას დაზიანებები ფეხში აღენიშნება. ექიმების თქმით, ჭრილობები დიდი ალბათობით თვითდაზიანების შედეგია იმისთვის, რომ ისინი ფრონტზე აღარ დაბრუნებულიყვნენ.
