აფხაზეთი და სამხრეთ ოსეთი საქართველოს განუყოფელი ნაწილია, ამას ვერ შეცვლის ვერც "არჩევნები" და ვერც უკანონო "რეფერენდუმი" - აშშ-ის საელჩო

აშშ ოკუპირებულ ცხინვალში ე.წ. საპრეზიდენტო არჩევნებს არ აღიარებს... მოვუწოდებთ რუსეთს, შეწყვიტოს საქართველოს ოკუპაცია - საელჩო

საქართველოში ამერიკის შეერთებული შტატების საელჩო აცხადებს, რომ აშშ ოკუპირებულ ცხინვალში გამართულ ე.წ. საპრეზიდენტო არჩევნებსა და მის შედეგებს არ აღიარებს.

როგორც საელჩოს განცხადებაშია აღნიშნული, აფხაზეთისა და სამხრეთ ოსეთის რეგიონები საქართველოს განუყოფელი ნაწილი.

"შეერთებული შტატები არ აღიარებს 10 აპრილს საქართველოს სამხრეთ ოსეთის რეგიონში გამართულ ეგრეთ წოდებულ საპრეზიდენტო არჩევნებსა და მის შედეგებს. ჩვენი პოზიცია აფხაზეთსა და სამხრეთ ოსეთთან დაკავშირებით ცალსახაა: ეს რეგიონები საქართველოს განუყოფელი ნაწილია. ამას ვერ შეცვლის ვერც „არჩევნები" და ვერც აპრიორი უკანონო „რეფერენდუმი", რომელიც სამხრეთ ოსეთს რუსეთის შემადგენლობაში შესვლისკენ მოუწოდებს. შესაბამისად, ჩვენ ხაზს ვუსვამთ ჩვენს მტკიცე მხარდაჭერას საქართველოს სუვერენიტეტისა და ტერიტორიული მთლიანობისადმი მის საერთაშორისოდ აღიარებულ საზღვრებში", - ნათქვამია განცხადებაში.

ამასთან, საელჩო კიდევ ერთხელ მოუწოდებს რუსეთს, დაუყოვნებლივ შეაჩეროს თავისი ომი უკრაინაში და საქართველოს ოკუპაცია, ასევე, შეასრულოს 2008 წლის ცეცხლის შეწყვეტის შეთანხმებით ნაკისრი ყველა ვალდებულება.

"ახლა, როდესაც რუსეთი უკრაინაში სასტიკ, არაპროვოცირებულ და გაუმართლებელ ომს აწარმოებს და გამიზნულად ესხმის თავს უკრაინელ ხალხსა და ქალაქებს, კიდევ უფრო მნიშვნელოვანია დაცვა ამ ფუნდამენტური პრინციპებისა, რომელიც საერთაშორისო უსაფრთხოების საფუძველს წარმოადგენს

ამიტომ, მოვუწოდებთ რუსეთს, დაუყოვნებლივ შეაჩეროს თავისი ომი უკრაინაში და მის მიერ საქართველოს ოკუპაცია, შეასრულოს 2008 წლის ცეცხლის შეწყვეტის შეთანხმებით ნაკისრი ყველა ვალდებულება. მათ შორის, რუსეთის ძალების გაყვანა კონფლიქტამდე არსებულ პოზიციებზე, საქართველოს რეგიონების: აფხაზეთისა და სამხრეთ ოსეთის დამოუკიდებლობის აღიარების გაუქმება და ამ რეგიონებში ჰუმანიტარული დახმარების თავისუფლად გადაადგილების უზრუნველყოფა", - ნათქვამია აშშ-ის საელჩოს განცხადებაში.