ოპოზიცია EU-ში გაწევრიანების კითხვარის გასაჯაროებას ითხოვს და ოლივერ ვარჰეის წერილით მიმართავს

ოპოზიცია ხელისუფლებისგან ევროკავშირის კითხვარის გასაჯაროებას ითხოვს. მათ სამეზობლო და გაფართოების საკითხებში ევროკომისარსაც მიმართეს ღია წერილით. 

ხელმომწერების განმარტებით, დოკუმენტი საზოგადოებისთვის არ არის ხელმისაწვდომი. მიზეზად მთავრობა აცხადებს, რომ კითხვარის გასაჯაროებისთვის მას ევროკავშირის ავტორიზაცია სჭირდება. ოპოზიცია ოლივერ ვარჰეის ასევე სთხოვს, მიაწოდოს ინფორმაცია, თუ ევროკავშირის რომელიმე პროცედურული წესი ხელს უშლის მთავრობას დოკუმენტი ხელმისაწვდომი და საჯარო გახადოს.

“უპირველეს ყოვლისა, გვსურს მადლობა გადაგიხადოთ თქვენი პირადი წვლილისთვის ევროკავშირის მიერ გასულ თვეში ჩვენი ქვეყნის სახელით შეტანილი ევროკავშირში გაწევრინებაზე განაცხადის პასუხად, შესაბამისი კითხვარის სწრაფ მიწოდებაში. უაღრესად დამაიმედებელია, რომ ევროკავშირმა აჩვენა პოლიტიკური ნება უკრაინის, საქართველოსა და მოლდოვისთვის შესაბამისი განხილვის პროცედურის დაჩქარების საკითხში. მმართველ პარტია „ქართულ ოცნებასთან“ ჩვენი მრავალი უთანხმოების მიუხედავად, იმის გათვალისწინებით, რომ ევროკავშირში გაწევრიანება ქართველი ხალხის ისტორიული არჩევანია, ჩვენ, ოპოზიციური პარტიების წარმომადგენლები და დამოუკიდებელი დეპუტატები მტკიცედ ვუჭერთ მხარს საქართველოს ევროკავშირში გაწევრიანებას.

ამ კონკრეტულ კომუნიკაციაში ჩვენ არ გავამახვილებთ თქვენს ყურადღებას ყველა იმ გადაუჭრელ საკითხზე, რომელიც დგას ჩვენს ქვეყანაში დემოკრატიის, კანონის უზენაესობისა და ფუნდამენტური უფლებების პატივისცემის კუთხით. ჩვენ არაერთხელ მოგმართეთ ამ შეშფოთებით როგორც თქვენ, ასევე ევროკავშირის ინსტიტუტებს. თუმცა ცხადია, რომ არსებითი რეფორმების გარეშე, საქართველოს პროგრესი ევროკავშირში გაწევრიანების რთულ გზაზე ძნელი იქნება.

ამის გათვალისწინებით და ასევე, შესაბამისი აღმასრულებელი უწყებების მიერ ევროკავშირის კითხვარზე პასუხის მომზადების პროცესზე საპარლამენტო ზედამხედველობის გასაძლიერებლად, ჩვენ მოვთხოვეთ მთავრობას გადმოეცა კითხვარი საზოგადოებისთვის, როგორც ხალხის, ასევე საპარლამენტო ოპოზიციის და დაინტერესებული არასამთავრობო ორგანიზაციების ინტერესის გათვალისწინებით. აქამდე მთავრობა თავს არიდებს ამის გაკეთებას და ამტკიცებს, რომ კითხვარის გასაჯაროებისთვის მას ევროკავშირის ავტორიზაცია სჭირდება.

ჩვენ გვესმის, რომ ევროკავშირის ინფორმირების შემდეგ მიმღებ მხარეს ე.ი. საქართველოს მთავრობას აქვს დისკრეცია, ევროკავშირის კითხვარი საჯაროდ ხელმისაწვდომი გახდეს. ჩვენ ვითხოვთ თქვენს დახმარებას საქართველოს ხელისუფლებასთან შესაბამისი პროცესის ხელშეწყობაში. თუ ევროკავშირის რომელიმე პროცედურული წესი ხელს უშლის მთავრობას აღნიშნულის გაკეთებაში, ჩვენ ასევე მადლობელი ვიქნებით ინფორმირებულები ვიყოთ ამის შესახებ”, - ნათქვამია წერილში.

ხელმომწერები: 

• არმაზ ახვლედიანი, დამოუკიდებელი დეპუტატი; 
• თეონა აქუბარდია, „სტრატეგია აღმაშენებელი“; 
• ანა ბუჩუკური, დეპუტატი „საქართველოსთვის“;
• ხატია დეკანოიძე დეპუტატი, “ერთიანი ნაციონალური მოძრაობა”; 
• თამარ კორძაია, დამოუკიდებელი დეპუტატი; 
• ანა ნაცვლიშვილი, დეპუტატი, „ლელო საქართველოსთვის“; 
• სალომე სამადაშვილი, დეპუტატი, „ლელო საქართველოსთვის“; 
• ხათუნა სამნიძე, დეპუტატი, "რესპუბლიკური პარტია“.

საქართველოს ევროკავშირის კანდიდატი ქვეყნის სტატუსის თვითშეფასების კითხვარი 11 აპრილს გადმოეცა