პარტიის იუბილეს ეხმაურება დედაქალაქის მერი და წერს, რომ "ქართულმა ოცნებამ" დემოკრატიული არჩევნებით ქვეყანა "ავტოკრატიული ჩიხიდან გამოიყვანა" და ევროპულ გზაზე "დააბრუნა"
"10 წლის წინ საქართველოს მოსახლეობის სულისკვეთების მხარდამხარ, საქართველოს საოცნებო მომავლის შენების სურვილით გულანთებულები შევიკრიბეთ ბიძინა ივანიშვილის ირგვლივ და დავაარსეთ პარტია „ქართული ოცნება-დემოკრატიული საქართველო“. ჩვენმა პარტიამ მოახერხა ქვეყანაში არსებული მაშინდელი პოლიტსპექტრის კონსოლიდაცია, დემოკრატიული არჩევნებით ქვეყნის ავტოკრატიული ჩიხიდან გამოყვანა და საქართველოს სწორი, ევროპული არჩევანისკენ სავალ გზაზე დაბრუნება!
დიდი გამოწვევაა პარტიისთვის გარე მტრისგან მომავალ საფრთხეებთან გამკლავება, დიდი ტვირთია შინაურ მტერთან პოლიტიკური დაპირისპირება, ყოველმხრივ გააზრებული პოლიტიკის გატარება და ამ რთულ ვითარებაში ქვეყნის სწორად მართვა.
ამავდროულად, დიდი სტიმულია ხალხის ნდობა და მხარდაჭერა.
დიდი პასუხისმგებლობაა დასახული მიზნებისკენ სვლა და უდიდესი ვალდებულებაა ქვეყნის წინსვლაში, სწორად განვითარებაში პარტიული კვალის დატოვება-უკეთესი საქართველოსთვის, მშვიდობიანი საქართველოსთვის, დოვლათიანი საქართველოსთვის, ჩვენი ყველას საოცნებო საქართველოსთვის!" წერს კალაძე.
ქართული ოცნების 10 წლის იუბილეზე, მისალოცი დაწერა დეპუტატმა ზავრადაშვილმა. თავად "ოცნებამ" კი ვრცელი განცხადება გაავრცელა და "მიღწევები" ჩამოთვალა. ტრადიციულად, მადლობა გადაუხადეს ბიძინა ივანიშვილსაც.
