მაღალმთიანი აჭარის მაჟორიტარი დეპუტატი ანზორ ბოლქვაძე ქონებრივ დეკლარაციაში სრულად არ ასახავს მისი და მისი ოჯახის წევრების ქონებას, კომპანიებსა და ამ კომპანიებიდან მიღებულ შემოსავლებს - ნათქვამია „საერთაშორისო გამჭვირვალობა - საქართველოს” კვლევაში.
2020 წლის მარტში ჩატარებული კვლევიდან იკვეთება, რომ ანზორ ბოლქვაძემ პარლამენტის მაჟორიტარი დეპუტატობის 12 წლის განმავლობაში, სავარაუდოდ, სწორედ მოქმედ და წინა ხელისუფლებასთან ახლო კავშირით და, შესაბამისად, გავლენებით უზრუნველყო საკუთარი ოჯახის, ასევე ნათესავებისა და სხვა დაახლოებული პირების ქონებისა და შემოსავლების მკვეთრი ზრდა სახელმწიფო შესყიდვების ხარჯზე.
- მისმა ოჯახმა ამ წლების განმავლობაში დაირეგისტრირა სასტუმროები ბეშუმსა და გოდერძის სამთო კურორტზე, რომელთაც ათეულ ათასობით კვადრატული მეტრი მიწის ნაკვეთები ეკუთვნით;
- 2008 წელს მაჟორიტარად არჩევიდან მალევე, მისი შვილი როლანდ ბოლქვაძე აჭარის საგზაო დეპარტამენტში დასაქმდა. ამჟამად იგი ლოჯისტიკის სამსახურის უფროსი და სატენდერო კომისიის წევრია;
- დეპუტატის ნათესავების კომპანიებმა: „აისმა”, „ქედემ” და „გიგა 2015”-მა ბოლო 5 წელიწადში ამავე დეპარტამენტიდან და აჭარაში მოქმედი სხვა შემსყიდველი ორგანიზაციებიდან სახელმწიფო ტენდერებისა და გამარტივებული შესყიდვების გზით 6 მილიონ ლარამდე მიიღეს.
ორგანიზაციაში მიიჩნევენ, რომ ამ კომპანიებისთვის უკონკურენტო გარემოს ხელოვნურად შექმნა საგამოძიებო ორგანოების მოკვლევის საფუძველი უნდა გახდეს.
კვლევამ აჩვენა, რომ მხოლოდ ბოლო 4 წლის განმავლობაში, სამმა კომპანიამ, რომელიც მის უახლოეს ნათესავებს უკავშირდება, მხოლოდ სახელმწიფო შეყიდვებიდან აქვს მიღებული 6 მილიონ ლარზე მეტი. რომ აღარაფერი ვთქვათ იმაზე, როგორ ახერხებს ანზორ ბოლქვაძე იმ ქონების დაგროვებას, რომლის ბაზაზე მერე ვითარდება სასტუმრო ბიზნესი, - ამბობს "საერთაშორისო გამჭვირვალობა - საქართველოს" რეგიონული ოფისების ხელმძღვანელი ზვიად ქორიძე.
