"დამაჯერებელი ნაბიჯი გადავდგით საბჭოთა საქართველოს მშენებლობაში" | მარგველაშვილი ნიკა გვარამიას დაკავებაზე 

საქართველოს მეოთხე პრეზიდენტმა, გიორგი მარგველაშვილმა "ფორმულას" ეთერში ტელეკომპანია "მთავარი არხის" გენერალური დირექტორის, ნიკა გვარამიას დაკავებაზე ისაუბრა და თქვა, რომ ეს დამაჯერებელი ნაბიჯია საბჭოთა საქართველოს მშენებლობაში. 

"ჩვენ კიდევ ერთი დამაჯერებელი ნაბიჯი გადავდგით საბჭოთა საქართველოს მშენებლობის თვალსაზრისით. ანუ, ავტორიტარული სახელმწიფოდან ვაშენებთ ტოტალიტარულ სახელმწიფოს და ეს არ არის ერთი მოულოდნელი, ექსტრაორდინარული ნაბიჯი. რა თქმა უნდა, ნაბიჯი მტკივნეულია, ნაბიჯი არის თავის თავის შესახებ მეტყველი, მაგრამ ეს არის ერთ-ერთი ნაბიჯი დემოკრატიული სახელმწიფოს დემონტაჟის წყებაში, რომელიც დაიწყო სახელმწიფო ინსტიტუტების მიტაცებით და ბუნებრივად, ლოგიკით გრძელდება მედიის დემონტაჟით და დამონებით იმიტომ, რომ ტოტალიტარულ სახელმწიფოში არამარტო სახელმწიფო, არამედ მედიაც და ბოლოს უკვე მთელი საზოგადოებაც უნდა იქცეოდეს ისე,როგორც ტოტალიტარული სახელმწიფოს მმართველს. ჩვენ ამ გზაზე დღეს კიდევ ერთი დამაჯერებელი ნაბიჯი გადავდგით",- ამბობს გიორგი მარგველაშვილი. 

ცნობისთვის, 16 მაისს, მოსამართლე ლაშა ჩხიკვაძემ "მთავარი არხის" გენერალურ დირექტორს, ნიკა გვარამიას 3 წლითა და 6 თვით პატიმრობა მიუსაჯა. ნიკა გვარამია სასამართლო დარბაზშივე დააკავეს.