"უზარმაზარი ბრძოლა იქნება" | ვერეშჩუკი ხერსონისა და ზაპოროჟიეს მოსახლეობას მოუწოდებს, ტერიტორია სწრაფად დატოვონ
გამოქვეყნდა:
უკრაინის ვიცე-პრემიერი, ირინა ვერეშჩუკი ხერსონისა და ზაპოროჟიეს დროებით ოკუპირებულ ტერიტორიებზე მცხოვრებ მოქალაქეებს მოუწოდებს, ტერიტორია რაც შეიძლება სწრაფად დატოვონო.
ვერშჩუკის თქმით, ეს აუცილებელია იმისთვის, რომ შეიარაღებულმა ძალებმა ტერიტორიების გათავისუფლება მშვიდობიანი მოსახლეობისთვის საფრთხის შექმნის გარეშე შეძლონ.
"რაც არ უნდა რთული იყოს ვითარება იმ ტერიტორიაზე, რომელსაც ახლა უკრაინის ხელისუფლება აკონტროლებს, ნებისმიერ შემთხვევაში, ხერსონის ან ზაპოროჟიეს რეგიონის ტერიტორიაზე ყოფნა ბევრად უარესი და საშიშია. რუსეთშიც რომ გადაასახლონ, ჩვენ მაინც ვიპოვით შესაძლებლობას, რომ ხალხს დაბრუნებაში დავეხმაროთ", - თქვა მან.
ვიცე-პრემიერი აცხადებს, რომ ბრძოლები სასტიკი იქნება, რადგან უკრაინული ძალები ამ ტერიტორიების დეოკუპაციას აპირებს.
"ჩვენი შეიარაღებული ძალები დეოკუპაციას აპირებს. იქნება უზარმაზარი ბრძოლები. არავის შეშინება არ მინდა, ყველას ყველაფერი ისედაც ესმის", - დასძინა ირინა ვერეშჩუკმა.
