დანაკარგების შემცირება მოვახერხეთ - პოდოლიაკმა დაასახელა ყოველდღიურად რამდენი უკრაინელი ჯარისკაცი იღუპება ფრონტზე

უკრაინის პრეზიდენტის აპარატის უფროსის მრჩევლის, მიხაილო პოდოლიაკის ინფორმაციით, ფრონტზე ახლა სამჯერ ნაკლები უკრაინელი ჯარისკაცი იღუპება, ვიდრე ივნისის დასაწყისში, პოდოლიაკის თქმით, ქვეყანამ დანაკარგების შემცირება მოახერხა და ახლა ფრონტზე ყოველდღიურად 30-50-მდე ადამიანი იღუპება. პოდოლიაკის ინფორმაციითვე, ეს ციფრი ზაფხულის დასაწყისში 100-200 ჯარისკაცამდე იყო.

"მაგრამ, კიდევ ერთხელ, მთლად სწორი არ არის ჩვენი მხრიდან ამაზე საუბარი. უფრო სწორია, როცა უკრაინის შეიარაღებული ძალების გენერალური შტაბი კონკრეტულ ციფრებს გამოაქვეყნებს, რამდენი ადამიანი დაიღუპა", - დასძინა მან BBC -სთან ინტერვიუში.

პოდოლიაკის თქმით, ივნისში უფრო დიდი დანაკარგები ომის მეორე ეტაპზე გადასვლამ განაპირობა, როდესაც საარტილერიო ომი დაიწყო.

”მაგრამ დღეს მსხვერპლის რაოდენობა მცირდება, პირველ რიგში, იმიტომ, რომ ჩვენი MLRS [თვითმავალი ზალპური ცეცხლის რეაქტიული საარტილერიო სისტემა] ძალიან ეფექტურად მუშაობს რუსული არმიის ლოჯისტიკურ ცენტრებში. მეორეც, რუსული არმია გადანაწილებულია ფრონტის მთელ ხაზზე. და მესამე, ჩვენები უკვე ადაპტირებულნი არიან." - განმარტა მან.

ცნობისთვის, 1-ელ  ივნისს, პრეზიდენტმა ვოლოდიმირ ზელენსკიმ განაცხადა, რომ ფრონტზე ყოველდღიურად 60-დან 100-მდე უკრაინელი ჯარისკაცი იღუპებოდა და ზიანდებოდა 500-მდე ადამიანი.

აპრილის შუა რიცხვებში, პრეზიდენტმა მასმედიას უთხრა, რომ ოკუპანტებთან ომში უკრაინის შეიარაღებული ძალების 2,5-3 ათასი ჯარისკაცი დაიღუპა. ამავდროულად, დაახლოებით 10 000 უკრაინელი ჯარისკაცი დაჭრილი იყო.

შეიარაღებული ძალების გენერალური შტაბს უკრაინული არმიის დანაკარგებზე ინფორმაცია არ გამოუქვეყნებია.