სუს-ის ინფორმაციით, ოკუპანტების მიერ, უკანონოდ დაკავებული აშშ-ს მოქალაქე, თავისუფალია

სუს-ის ინფორმაციით, რუსეთის საოკუპაციო ძალების მიერ უკანონოდ დაკავებული აშშ-ის მოქალაქე ფრენკ იანეზი თავისუფალია და ცენტრალური ხელისუფლების მიერ კონტროლირებად ტერიტორიაზე იმყოფება.

ამერიკის მოქალაქის დაკავების ფაქტს სუსი დღემდე ასაიდუმლოებდა. ფრენკ იანეზის გათავისუფლების შემდეგაც სახელმწიფო უსაფრთხოების სამსახური ბევრ დეტალს არ ასაჯაროებს. არაფერს ამბობენ როდის და სად დააკავეს  ამერიკის მოქალაქე უკანონოდ და რა პერიოდი გაატარა მან ცხინვალის იზოლატორში.

"მისი დაუყოვნებლივი გათავისუფლების მოთხოვნით, საქართველოს ცენტრალური ხელისუფლება აქტიურად იყენებდა როგორც „ცხელი ხაზის“ მექანიზმს, ასევე, ცენტრალური ხელისუფლების ხელთ არსებულ სხვა ინსტრუმენტებს.
 
ინფორმაცია მუდმივ რეჟიმში მიეწოდებოდა ჟენევის საერთაშორისო დისკუსიების თანათავმჯდომარეებსა და საერთაშორისო პარტნიორებს.
 
ცენტრალური ხელისუფლება განაგრძობს აქტიურ მუშაობას უკანონოდ დაკავებული პირების გასათავისუფლებლად, როგორც ოკუპირებული ცხინვალის, ისე ოკუპირებული აფხაზეთის მიმართულებით.
 
საქართველოს ოკუპირებულ რეგიონებსა და საოკუპაციო ხაზის გასწვრივ განხორციელებულ დესტრუქციულ ქმედებებზე სრული პასუხისმგებლობა ეკისრება საოკუპაციო ძალას." ნათქვამია სუს-ის განცხადებაში.