"გაზის მიწოდებასთან დაკავშირებული პრობლემები სანქციების მოხსნამდე შენარჩუნდება" | პესკოვი

კრემლის პრესსპიკერის, დმიტრი პესკოვის თქმით, Nord stream 1-ით ევროპისთვის გაზის მიწოდებასთან დაკავშირებული პრობლემები შენარჩუნდება ვიდრე სანქციები არ მოიხსნება, რაც მილსადენის ბლოკების მოვლა-პატრონობას ხელს უშლის. 

"თქვენ იცით, რომ პრობლემები დატუმბვასთან დაკავშირებით წარმოიშვა დასავლეთის სახელმწიფოების მიერ ჩვენი ქვეყნის და რიგი კომპანიების წინააღმდეგ დაწესებული სანქციების გამო, მათ შორის, გერმანიისა და დიდი ბრიტანეთის მიერ. სხვა მიზეზები, რომლებიც დატუმბვის პრობლემებს გამოიწვევდა, არ არსებობს“, - ამბობს პესკოვი.

მისი თქმით, სანქციებმა ვითარება იქამდე მიიყვანა, რომ აგრეგატების მომსახურება და გადაადგილება უკვე შეუძლებელია.

"რა თქმა უნდა, სწორედ ეს სანქციები, რომლებიც ხელს უშლის აგრეგატების მომსახურებას, ხელს უშლის მათ გადაადგილებას შესაბამისი სამართლებრივი გარანტიების გარეშე, რაც ხელს უშლის ამ სამართლებრივი გარანტიების გაცემასაც და ა.შ. სწორედ ეს სანქციები, რომლებიც შემოიღეს დასავლეთის სახელმწიფოებმა, სწორედ მათ მიიყვანეს ვითარება იქამდე, რასაც ახლა ვხედავთ“, - თქვა პესკოვმა.

შეგახსენებთ, რომ რუსეთმა მილსადენ  Nord Stream 1-ით ევროპისთვის გაზის მიწოდება სრულად შეაჩერა, ამის მიზეზად კი სარემონტო სამუშაოების ასახელებს.