"თავიდანვე გავემიჯნეთ... მმართველი პარტია ვართ და განსხვავებული პასუხისმგებლობა გვაქვს" | კობახიძე "წასულებზე"

"არცერთხელ, არცერთი განცხადება არ დაგვიდასტურებია, შეიძლება 100%-ით მართალიც იყო რომელიმე განცხადება, მაგრამ ჩვენ ვართ მმართველი პარტია და გვაქვს განსხვავებული პასუხისმგებლობა", - ამბობს "ოცნების" თავმჯდომარე ირაკლი კობახიძე "პალიტრანიუსის" ეთერში, ე.წ. განდგომილებზე საუბრისას. 

მისი თქმით, "ოცნება" პარტიიდან წასულებს თავიდანვე გაემიჯნა და პრემიერის განცხადებაც სწორედ ამის დადასტურება იყო.

"ეს ოთხი ადამიანი და მათი საზოგადოებრივი მოძრაობა აკეთებდა განცხადებებს და ჩვენ ყოველ ჯერზე ვამბობდით, რომ ჩვენ ვართ მმართველი პარტია და ასეთი ტიპის საჯარო რიტორიკაში ვერ შევალთ, ჩვენ ამას ყოველთვის ვამბობდით. არც ერთხელ, არცერთი განცხადება არ დაგვიდასტურებია, შეიძლება 100%-ით მართალიც იყო რომელიმე განცხადება, თუნდაც ყველა განცხადება, მაგრამ ჩვენ მკაფიოდ ვთქვით, რომ ჩვენ ვართ მმართველი პარტია და შესაბამისად გვაქვს განსხვავებული პასუხისმგებლობა.

თავიდანვე ჩვენი უთანხმოება რას უკავშირდებოდა?! ჩვენთვის არ იყო მისაღები საჯაროდ ამ პოლემიკაში შესვლა და ჩვენი კოლეგები ამბობდნენ, რომ თუ ხალხამდე არ მიიტანდნენ სიმართლეს, ამ შემთხვევაში შეიძლება არასწორი მიმართულებით წასულიყო პროცესები. ჩვენ ამაზე თავიდანვე ვერ შევთანხმდით და ეს საზოგადოებას ვაცნობეთ, ჩვენ ვთქვით, რომ გვქონდა განსხვავებული ხედვა იმასთან დაკავშირებით თუ რა ფორმით უნდა გაგრძელებულიყო კომუნიკაცია ჩვენს საერთაშორისო პარტნიორებთან. ამ კუთხით ჩვენ თავიდანვე გავემიჯნეთ და ეს დღემდე ძალაშია და ამის ხელმეორედ დადასტურება იყო პრემიერის განცხადება", - თქვა კობახიძემ.