კუპიანსკში ოკუპანტებს შრი-ლანკელი 7 სტუდენტი სარდაფში ჰყავდათ გამოკეტილი - ზელენსკი
გამოქვეყნდა:
ხარკოვის ოლქის ქალაქ კუპიანსკის განთავისუფლების შემდეგ, უკრაინელმა სამხედროებმა იპოვეს რამდენიმე ადგილი, სადაც რუს სამხედროებს მოქალაქეები ჩაკეტილი ჰყავდათ.
15 სექტემბერს სახელმწიფო სასაზღვრო სამსახურმა გაავრცელა ინფორმაცია, რომ იპოვეს და გაათავისუფლეს 13-15 წლის ხუთი მოზარდი, რომლებიც რუსებს სარდაფში ჰყავდათ გამოკეტილი. ყველა მათგანი ადგილობრივი სამედიცინო კოლეჯის მოსწავლეა.
16 სექტემბერს ზელენსკიმ ვიდეომიმართვაში თქვა, რომ გათავისუფლდა შრი-ლანკის 7 მოქალაქე, რომლებიც ასევე სამედიცინო კოლეჯის სტუდენტები არიან.
„ხარკოვის ოლქში რუსული ოკუპაციისგან გათავისუფლებულ ტერიტორიებზე საგამოძიებო მოქმედებები მიმდინარეობს. იპოვეს წამების კამერები, რომლებშიც შეურაცხყოფა მიაყენეს ოკუპირებული ქალაქებისა და დაბების მშვიდობიან მცხოვრებლებს, ოთახები, რომლებშიც ადამიანები - უცხოელებიც კი იმყოფებოდნენ. კერძოდ, შრი-ლანკის რესპუბლიკის შვიდი მოქალაქე, კუპიანის სამედიცინო კოლეჯის სტუდენტები. ჯერ კიდევ მარტში ისინი რუსმა ჯარისკაცებმა შეიპყრეს, მოგვიანებით კი სარდაფში ჩაკეტეს"- ნათქვამია პრეზიდენტის ოფისის განცხადებაში.
პრეზიდენტმა ვოლოდიმირ ზელენსკიმ თქვა, რომ მხოლოდ ახლა, ქალაქის გათავისუფლების შემდეგ, ეს ადამიანები გადარჩნენ და ისინი სამედიცინო დახმარებას იღებენ.
