"საკუთარი სიცოცხლის გადასარჩენად მოქმედებდა" | ლაღიძის ქუჩაზე მომხდარ აფეთქებაზე დაკავებულის ადვოკატი
გამოქვეყნდა:
ლაღიძის ქუჩაზე მომხდარი განზრახ მკვლელობის მცდელობის ფაქტზე დაკავებული პირის ადვოკატის, გიორგი ბარდაველიძის განცხადებით, მისი დაცვის ქვეშ მყოფი პირი აცხადებს, რომ ყუმბარა მხოლოდ საკუთარი სიცოცხლის გადასარჩენად გამოიყენა.
უფლებადამცველის განცხადებას "რადიო თავისუფლება" ავრცელებს.
„არანაირი განზრახვა არ ჰქონია ვინმესთვის ზიანი მიეყენებინა. მკვლელობის მცდელობის განზრახვა არ ჰქონია, არათუ მკვლელობის მცდელობის, არამედ ზიანის მიყენებისაც. უბრალოდ, როდესაც აპირებდნენ მის მიმართ რიგ იძულებითი ღონისძიებების გამოყენებას და მის სიცოცხლეს, ჯანმრთელობას საფრთხე ემუქრებოდა, შემდეგ რაც მოხდა ყველამ იცით...
ეს ხელყუმბარა მას ჰქონდა თუ იმ პირებს წაართვა, ჯერ არ ვიცი. ამ ეტაპზე მეტი კონკრეტიკისგან თავს შევიკავებ, რადგან გამოძიებას არ შევუშალო ხელი, როგორც შსს-ის, ისე ალტერნატიულ გამოძიებასაც, რომელსაც დაცვის მხარე ატარებს და რიგ მასალებს აგროვებს. კატეგორიულად შემიძლია ვთქვა, რომ დანაშაულის მოტივი და განზრახვა არ ჰქონია. მისი ქმედება განპირობებული იყო საკუთარი სიცოცხლისა და ჯანმრთელობის გადასარჩენად. ჩემი დაცვის ქვეშ მყოფს წარმოდგენა არ აქვს, ამ პირებს რა მოტივი ამოძრავებდათ. მათთან კონფლიქტში მყოფი პიროვნება არ ყოფილა და არანაირი დაპირისპირება არ ჰქონია. მისთვის უცნობი პირები იყვნენ“,- განაცხადა ადვოკატმა, გიორგი ბარდაველიძემ.
ადვოკატის თქმით, დაკავებულს ბრალს, სავარაუდოდ, 24 ოქტომბერს წარუდგენენ.
ამავე თემაზე:
- აფეთქება ლაღიძის ქუჩაზე - 3 ადამიანი კლინიკაშია | ადგილობრივები მომხდარის რამდენიმე ვერსიაზე საუბრობენ
- აფეთქება ლაღიძის ქუჩაზე - დაშავებულია 3 ადამიანი
- აფეთქება ლაღიძის ქუჩაზე | ადგილობრივების თქმით, სავარაუდოდ, ხელყუმბარა აფეთქდა - დაშავებულია ახალგაზრდა კაცი
