ბოსტნეული-26%-ით, პური 23%-ით, შაქარი 12%-ით გაძვირდა - საქსტატის მონაცემები წლიურ ინფლაციაზე
გამოქვეყნდა:
2023 წლის იანვარში წინა თვესთან შედარებით ინფლაციის დონემ 0,8% შეადგინა, ხოლო წლიური ინფლაციის დონე 9,4%-ია. ამის შესახებ მონაცემებს საქართველოს სტატისტიკის ეროვნული ცენტრი ავრცელებს.
ცენტრის ინფორმაციით, წინა წელთან შედარებით, ფასების ყველაზე დიდი ზრდა შეინიშნება სურსათისა და უალკოჰოლო სასმელების ნაწილში, რომელიც 15%-ით გაზარდა, რაც წლიურ ინფლაციაზე 5,03 პროცენტული პუნქტით აისახა. ფასები მომატებულია შემდეგ ქვეჯგუფებზე:
- ბოსტნეული და ბაღჩეული გაძვირდა 26,5%-ით;
- პური და პურპროდუქტების ფასებმა მოიმატა 22,8%-ით;
- ყავა, ჩაი და კაკაო გაძვირდა 17,1%-ით;
- რძე, ყველი და კვერცხი - 16,7%-ით;
- მინერალური და წყაროს წყალი, უალკოჰოლო სასმელები და ნატურალური წვენები - 16,5%-ით;
- თევზეული 13,0%-ით;
- შაქარი, ჯემი და სხვა ტკბილეული გაძვირდა 12,4%-ით;
- ხორცი და ხორცის პროდუქტებზე ფასებმა მოიმატა 8,7%-ით;
- ხოლო ზეთი და ცხიმი გაძვირდა 4,7%-ით;
13,1%-ით გაიზარდა ფასები საცხოვრებელი, წყლის, ელ.ენერგიისა და აირის სექტორში: ფაქტიური გადასახადი საცხოვრებელზე გაიზარდა 40%-ით, ხოლო საცხოვრებლის მიმდინარე მოვლა და შეკეთება გაძვირდა 9,1%-ით.
ტრანსპორტის ჯგუფში ფასები გაიზარდა 5,2%-ით, რაც 0,63 პროცენტული პუნქტით აისახა მთლიანი ინდექსის ზრდაზე: ფასები 18,5%-ით მომატებულია სატრანსპორტო მომსახურებაზე, ხოლო პირადი სატრანსპორტო საშუალების ექსპლუატაცია (გამოყენება) გაძვირდა 2,8%-ით. ფასები შემცირდა სატრანსპორტო საშუალების შეძენაზე, სადაც კლებალ 2,5% შეადგინა.
აღსანიშნავია, რომ წლიური ინფლაციის ნაწილში კლების ტენდენცია შეინიშნება, თუმცა ახლანდელი 9,4% 3-ჯერ უფრო მეტია ვიდრე საქართველოს ეროვნული ბანკის სამიზნე, რომ ინფლაცია 3%-ამდე შემცირდეს.
