"ნუ წაართმევთ ჩვენს შვილებს ჯანმრთელობის უფლებას" - კანცელარიასთან აქცია მიმდინარეობს

"დაუფინანსეთ წამალი ბავშვებს" - ამ წუთებში მთავრობის კანცელარიასთან აქონდროპლაზიის სინდრომის მქონე ბავშვების მშობლების საპროტესტო აქცია მიმდინარეობს. მათ ადმინისტრაციის შენობასთან ორი ღამე გაათენეს, თუმცა შედეგი ისევ არ აქვთ. თვეებია მშობლები ქვეყანაში კონკრეტული წამლის შემოტანას ითხოვენ.

აქციას მშობლები შვილებთან და შვილიშვილებთან ერთად რეგიონებიდანაც შეუერთდნენ.

გუშინ მშობლებს პრემიერის ნაცვლად, ჯანდაცვის მინისტრი შეხვდა. ზურაბ აზარაშვილი იმეორებს, რომ მსოფლიოს არცერთ ქვეყანაში, სახელმწიფო ბიუჯეტიდან, მოთხოვნილი წამლით მკურნალობა, ამ ეტაპზე, არ ფინანსდება.

აქციის მონაწილეებმა კანცელარიასთან აღმართულ ღობეზე გააკრეს ბანერები წარწერებით - "პური და სანახაობა > ბავშვების ჯანმრთელობა"; "აქონდროპლაზია არ არის უბრალოდ ზრდის შეფერხება, ნუ გვატყუებთ!" "ნუ წაართმევთ ჩვენს შვილებს ჯანმრთელობის უფლებას".

მშობლები ამბობენ, რომ აქციები გაგრძელდება მანამ, სანამ პრემიერისგან კონკრეტულ პასუხს არ მიიღებენ.

ცნობისთვის, აქონდროპლაზია გენეტიკური დაავადებაა, როცა ბავშვის სხეული ასიმეტრიულად ვითარდება და ის დაახლოებით 25 ათასიდან ერთ შემთხვევაში ვლინდება. წამალი, რომელიც ბავშვებისთვის სასიცოცხლოდ მნიშვნელოვანია დღეს საქართველოში არ შემოდის. მშობლები ამბობენ, რომ რომც შემოდიოდეს, დახმარების გარეშე, პირადი სახსრებით ვერ შეძლებენ მის შეძენას.