ქუჩაში რატომ უნდა მეძინოს სამი შვილის დედას?! - აქონდროპლაზიის სინდრომის მქონე ბავშვების მშობლები პრემიერთან შეხვედრას ითხოვენ

ამ წუთებში მთავრობის კანცელარიასთან აქონდროპლაზიის სინდრომის მქონე ბავშვების მხარდასაჭერი აქცია იმართება. მშობლები პრემიერმინისტრთან შეხვედრას ითოხვენ. ადგილზე მობილიზებულია პოლიციაც.

თვეებია მშობლები აქციებს მართავენ და ქვეყანაში კონკრეტული მედიკამენტის შემოტანას და მის დაფინანსებას ითხოვენ. მათ ორი ღამე კანცელარიის შენობასთან გაათენეს. მშობლები ამბობენ, რომ აქციები გაგრძელდება მანამ, სანამ პრემიერისგან კონკრეტულ პასუხს არ მიიღებენ.

"არ ემეტებათ ფული, არ ემეტებათ, ძვირი ღირს. დამერწმუნეთ, ეს რომ ღირდეს 100 000 ძალიან მალე შემოიტანდნენ, არ ემეტებათ ფული, ეშინიათ, რომ კიდევ სხვები გამოჩნდებიან, ფინანსებია პრობლემა. ჩვენი შვილების ჯანმრთელობა ჩემთვის მილიარდი ღირს, არაფერი არ არის, ჩემი შვილისთვის მინდა წამალი, წამალი გვინდა ხალხო, წამალს ვითხოვთ რომ უკეთესი მომავალი ჰქონდეთ მათ. ყოველი დღე უკან გადადგმული ნაბიჯია ჩვენთვის, ვიხოცებით, არ უნდა შეგვხვდნენ?! ქუჩაში რატომ უნდა მეძინოს სამი შვილის დედას", - ამბობს აქციის ერთ-ერთი მონაწილე. 

გუშინ მშობლებს პრემიერის ნაცვლად, ჯანდაცვის მინისტრი შეხვდა. ზურაბ აზარაშვილი იმეორებს, რომ მსოფლიოს არცერთ ქვეყანაში, სახელმწიფო ბიუჯეტიდან, მოთხოვნილი წამლით მკურნალობა, ამ ეტაპზე, არ ფინანსდება.

აქციის მონაწილეებმა კანცელარიასთან აღმართულ ღობეზე გააკრეს ბანერები წარწერებით - "პური და სანახაობა > ბავშვების ჯანმრთელობა"; "აქონდროპლაზია არ არის უბრალოდ ზრდის შეფერხება, ნუ გვატყუებთ!" "ნუ წაართმევთ ჩვენს შვილებს ჯანმრთელობის უფლებას".