აქონდროპლაზიის მქონე ბავშვების წამლით უზრუნველყოფას ბევრად ნაკლები სჭირდება, ვიდრე "საზმაუს" ან "აწარმოე საქართველოს" - "გირჩი-მეტი თავისუფლება"
გამოქვეყნდა:
პარტია "გირჩი-მეტი თავისუფლება" აქონდროპლაზიის მქონე ბავშვების მშობლების აქციას ეხმაურება.
განცხადებაში პარტია აღნიშნავს, რომ აქონდროპლაზიის მქონე ბავშვების წამლით უზრუნველყოფას ბევრად ნაკლები თანხა სჭირდება, ვიდრე საზოგადოებრივ მაუწყებლის, ან "აწარმოე საქართველოში"-ს პროექტის დაფინანსებას.
"აქონდროპლაზიის მქონე 20-მდე ბავშვის წამლით უზრუნველყოფას წელიწადში 6 მილიონ ევრომდე სჭირდება. ბევრად ნაკლები, ვიდრე 100 მილიონი ლარით დაფინანსებულ ე.წ. საზოგადოებრივ მაუწყებელს, ან ქართულ-ჯიგრულ პონტში მოქმედ "აწარმოე საქართველოში"-ს პროექტს, რომელმაც გასულ წელს, უამრავ მავნებლობაში, ხალხის ჯიბიდან 270 მილიონი ლარი დახარჯა.
• ღარიბი ქვეყანა ვართ, მაგრამ არც იმდენად გვიჭირს, რომ 20 ბავშვის სიცოცხლისთვის საკმარისი ფული არ გვქონდეს.
• შესაბამისად, სოციალური პოლიტიკის რეფორმა უნდა ითვალისწინებდეს,
• ჯანდაცვისა და სოციალური დახმარების მიზნობრივად ქცევის შედეგად, თითოეულ ოჯახზე გამოყოფილი თანხის მნიშვნელოვნად გაზრდას.
• სავალდებულო სახელმწიფო საპენსიო ფონდის გაუქმებას და დაგროვებული ფულის მოქალაქეებისათვის დაბრუნებას;
• საქველმოქმედო ინიციატივების ხელშეწყობას და წახალისებას საგადასახადო შეღავათების დაწესების გზით", - ნათქვამია "გირჩი-მეტი თავისუფლების" განცხადებაში.
შეგახსენებთ, უკვე წელიწადზე მეტია აქონდროპლაზიის მქონე ბავშვების დედები შვილებისთვის საჭირო წამლის შემოტანასა და დაფინანსებას ითხოვენ. ბოლო კვირების განმავლობაში მშობლები პრემიერმინისტრთან შეხვედრას უშედეგოდ ითხოვენ. ისინი რამდენიმე დღეა უკვე კანცელარიასთან ღამეებს ათევენ. ჯანდაცვის სამინისტრო ამტკიცებს, რომ პრეპარატი ევროკავშირში დამტკიცებული არაა. მინისტრის მოადგილის, თამარ გაბუნიას თქმით, "ვოსორიტიდის" ქვეყანაში შემოტანის პროცედურებს მხოლოდ იმ შემთხვევაში დაიწყებენ, თუ მიმდინარე წლის სექტემბრის ბოლომდე, ევროკავშირის, თუნდაც, რამდენიმე ქვეყანაში დადასტურდება სახელმწიფოს მიერ ამ მედიკამენტით პაციენტების უზრუნველყოფა.
