გთხოვთ, დაგმოთ ბავშვების წინააღმდეგ ჩადენილი დანაშაული - რადას დეპუტატი საქართველოს მთავრობას

"ქართული ოცნების" მორიგ არამეგობრულ ნაბიჯს გამოხმაურება მოჰყვა უკრაინის მხრიდან. რადას დეპუტატი, ვოლოდიმერ არიევი "მთავარ არხთან" ინტერვიუში საქართველო-უკრაინის მჭიდრო ურთიერთობების მნიშვნელობაზე საუბრობს და კიდევ ერთხელ ახსენებს საქართველოს ხელისუფლებას, რომ მეგობარი ქვეყნების მთავარი მტერი მხოლოდ ოკუპანტი რუსეთია.

"მე , პიროვნებამ , რომელმაც პირველმა წარვუდგინე უკრაინის პარლამენტს "დრაფტი" საქართველოში რუსეთის შეჭრის შესახებ, მინდა ვუთხრა საქართველოს მთავრობას, გთხოვთ, დაგმოთ ბავშვების წინააღმდეგ ჩადენილი დანაშაული. ჩვენს ერებს გვაქვს მეტი საერთო , ვიდრე განმასხვავებელი. ჩვენ არ გვაინტერესებს მთავრობისა და ოპოზიციის ურთიერთობა,  როცა ხარ ხელისუფლებაში გაქვს საკუთარი ურთიერთობა ოპოზიციასთან , მაგრამ ეს არ უნდა ახდენდეს უარყოფით გავლენას ჩვენი ქვეყნების ურთიერთობაზე. ჩვენ უნდა დავეხმაროთ ერთმანეთს , რადგან ჩვენი მომავალი პირდაპირ არის დამოკიდებული ჩვენს ერთიანობაზე." ამბობს დეპუტატი "მთავარ არხთან"

შეგახსენებთ, ევროპის საბჭოს საპარლამენტო ასამბლეამ უკრაინელი ბავშვების რუსეთში დეპორტაცია გენოციდად აღიარა. ასამბლეამ 87 ხმით 1-ის წინააღმდეგ, რეზოლუცია ხუთშაბათს მიიღო სტრასბურგში მიმდინარე საგაზაფხულო სესიაზე.

დოკუმენტზე საქართველოს ხელისუფლების არც ერთი წარმომადგენლის ხელმოწერა არ ფიქსირდება. "ქართულ ოცნებაში" ამბობენ, რომ სტრასბურგიდან უკვე გამოფრენილები იყვნენ, რის გამოც, კენჭისყრაში მონაწილეობა ვერ მოახერხეს.