მშობლებს მოვუწოდებ, გავაგრძელოთ პროცესი სამინისტროში, რაც ხდება არ წაადგება ამ საქმეს - აზარაშვილი
გამოქვეყნდა:
ჯანდაცვის მინისტრი, ზურაბ აზარაშვილი აქონდროპლაზიის სინდრომის მქონე ბავშვების მშობლებს, რომლებიც მეორე კვირაა ღამეს კანცელარიასთან ათენებენ მოუწოდებს, სამინისტროში, სამუშაო მაგიდასთან გაგრძელდეს პროცესები.
მისი თქმით, ის რაც დღეს ხდება, საქმეს არ წაადგება. აზარაშვილი ამტკიცებს, რომ ხმაურისა და დაძაბულობის ფონზე, ძალიან რთულია, რომ პროცესი გაგრძელდეს.
"ამ ჩვენ ყოველდღიურ მცდელობებს, რომ აღნიშნული იშვიათი დაავადების ირგვლივ რა პრობლემებიც არის შექმნილი და რასაც ვცდილობთ გამოვასწოროთ ამ პრობლემის მიმართ მიდგომა და ყველა ის პროცესი, რაც დაწყებული გვაქვს ამ ფორმატში, ამ ხმაურის ფონზე, ამ დაძაბულობის ფონზე, მერწმუნეთ ძალიან რთულია რომ პროცესი გაგრძელდეს. ასევე მხარეები ძალიან ხშირად აღნიშნავენ იმას, რომ ეს პროცესი არ უნდა მიმდინარეობდეს ასეთი პროტესტის ფონზე და სამინისტრო და დაინტერესებული მხარეები უნდა იყვნენ კონსტრუქციულ ფორმატში, მაგიდასთან, საჭიროების შემთხვევაში, აქედან გამომდინარე, მე მინდა მშობლებს ვთხოვო კიდევ ერთხელ და მოვუწოდო, გავაგრძელოთ შეთანხმებები და ყველა ის პროცესი, რაც აუცილებელია ამ იშვიათი დაავადებების მკურნალობის და მეთოდების ქვეყანაში დასანერგად, გავაგრძელოთ სამინისტროში, სამუშაო მაგიდასთან ყველა იმ ფორმატში, რომელი ფორმატების მეშვეობითაც ჩვენ ვცდილობთ, რომ ამ იშვიათ დაავადებას მივხედოთ და პრობლემები მოვაგვაროთ. ის რაც დღეს და გასული დღეების განმავლობაში ხდება, თვითონაც ხედავენ, რომ ეს არანაირად არ წაადგება ამ საქმეს", - თქვა აზარაშვილმა.
მისი თქმით, გაითვალისწინებენ მშობლების თხოვნას და უწყებათაშორის საბჭოს სხდომაზე, როცა ამ კონკრეტულ იშვიათ დაავადებაზე იმსჯელებენ დედებსაც მიიწვევენ, ასევე, მათ საშუალება ექნებათ პროტოკოლის შექმნის ჯგუფის მუშაობაში ჩაერთონ.
"ჩვენ არასდროს არავისთვის უარი არ გვითქვამს აღნიშნული იშვიათი დაავადების მკურნალობასთან დაკავშირებით, ასევე, არასდროს არ გაკეთებულა აქცენტი, რომ ბიუჯეტში არის წელს, ან არ არის წელს, იყო წინა წელს, თუ მომდევნო წელს იქნება. აქედან გამომდინარე, ის საკითხი, რომ ბიუჯეტთან მიმართებაში არის პრობლემა, არასდროს დაფიქსირებულა და კიდევ ერთხელ ამას ვადასტურებ. ჩვენი სამინისტრო არცერთი დღე არ შეჩერებულა ამ მიმართულებით და რამდენიმე მხარესთან აქვს მუდმივი და უწყვეტი კომუნიკაცია", - თქვა ზურაბ აზარაშვილმა.
ცნობისთვის, დედებმა დღესაც მიმართეს ჯანდაცვის მინისტრის მოადგილე, თამარ გაბუნიას და მოუწოდეს, შეხვდეს მათ.
