ეს "გასაოცარი გეგმა", რუსული წინადადების ანალოგია - პოდოლიაკი ინდონეზიის შეთავაზებაზე

უკრაინის პრეზიდენტის აპარატის უფროსის მრჩეველი მიხაილო პოდოლიაკი ინდონეზიის სამშვიდობო გეგმას გამოეხმაურა და მას რუსული წინადადების ანალოგი უწოდა.

პოდოლიაკის თქმით, მხოლოდ ერთადერთი წინადადება არსებობს, რომლითაც რეალურად შესაძლებელია ომის დასრულება - დატოვოს რუსეთმა უკრაინის სუვერენული ტერიტორია.

"კიდევ ერთი "სამშვიდობო მოლაპარაკების" წინადადება, ამჯერად ინდონეზიისგან.  ეს "გასაოცარი გეგმა", როგორც სხვადასხვა მსგავსი გეგმები, რომლებიც ასახულია სხვადასხვა "ლენინის/დოსტოევსკის ქვეყნის მეგობრების" მიერ, რუსული წინადადების ანალოგია.

[..]

ამას სერიოზულად უნდა ვუსმინოთ? 465-დღიანი ომი თავისუფლებისთვის, რომ მოვისმინოთ კიდევ ერთი წინადადება დაჩოქებაზე? არსებობს მხოლოდ ერთი რეალური წინადადება - იმისთვის, რომ ომი მართლაც დასრულდეს და მსოფლიო საერთაშორისო სამართალს, სამართლიანობას დაუბრუნდეს, აუცილებელია, რუსეთი გავიდეს უკრაინის სუვერენული ტერიტორიებიდან...დაუყოვნებლივ. ამის შემდეგ - მოლაპარაკებები ბუფერულ ზონაზე, რაკეტებზე, რეპარაციებსა და ა.შ. და მითიური "მორიგება", რომელშიც ისინი "დანებებას" გულისხმობენ, საჭირო არაა", - წერს პოდოლიაკი. 

ინდონეზიამ უკრაინას თავისი სამშვიდობო გეგმა შესთავაზა. ინდონეზიის გეგმის ძირითადი პუნქტებია: ცეცხლის შეწყვეტა, დემილიტარიზებული ზონის შექმნა სამშვიდობოების კონტროლის ქვეშ და ახალი რეფერენდუმების გამართვა „სადავო ტერიტორიებზე“ გაეროს ეგიდით. თუმცა, რა იგულისხმება "სადავო ტერიტორიებში" ეს განმარტებული არ არის.