უკავშირდება თაღლითურ სქემას, დაკავებულია 8 პირი - თბილისში, რამდენიმე ადგილას სპეცოპერაცია ჩატარდა
გამოქვეყნდა:
თბილისში, გუშინ ღამით, ერთდროულად რამდენიმე ადგილზე სამართალდამცველები იყვნენ მობილიზებული. მათ შორის იყო კოსტავას ქუჩაზე მდებარე ერთ-ერთი ბარი, სადაც სპეცოპერაციას ცენტრალური კრიმინალური პოლიცია ატარებდა.
არსებული ინფორმაციით, საქმე ტურისტებისთვის დიდი ოდენობით თანხის თაღლითური სქემით გამოძალვას ეხება. საქმეზე 8 ადამიანია დაკავებული.
"სპეციალური საპოლიციო ღონისძიება მიმდინარეობს სხვადასხვა ლოკაციაზე, მათ შორის ერთ-ერთი არის აღნიშნული კლუბი. დაკავებულია 8 პირი. აღნიშნული საპოლიციო ღონისძიება უკავშირდება თაღლითურ სქემას. დამატებითი და დეტალური ინფორმაცია მედიისთვის მოგვიანებით გახდება ცნობილი", - თქვა ცენტრალური კრიმინალური პოლიციის ტრეფიკინგის და უკანონო მიგრაციის წინააღმდეგ ბრძოლის განყოფილების უფროსმა, გრიგოლ გოგოჩაშვილმა.
დამატებითი დეტალების შესახებ შინაგან საქმეთა სამინისტროს ინფორმაცია ჯერ არ გაუვრცელებია.
