არასწორად იყო მითითებული სახელი და გვარი და პიროვნებამ განაცხადა, რომ საერთოდ არ ყოფილა შოვში - ქარსელაძის განმარტება "დაკარგულზე"
გამოქვეყნდა:
ირკვევა, რომ პირი, რომელიც დაკარგულთა სიიდან ამოიღეს, შოვში საერთოდ არ ყოფილა. ამის შესახებ განცხადება ინფრასტრუქტურის მინისტრმა, ცოტა ხნის გაკეთებულ კომენტარში გააკეთა, სადაც განმარტა, როგორ მოხვდა ზურაბ ბიბილეიშვილი შოვის სტიქიის შედეგად დაკარგულთა სიაში და როგორ იპოვეს დღეს ის სახლში, თბილისში.
ირაკლი ქარსელაძის თქმით, შეტყობინება დაკარგული პირის შესახებ, ონის მერიაში სტიქიის პირველივე ღამეს ამოქმედებულ ცხელ ხაზზე შევიდა:
"თქვენ იცით, რომ ჩამოყალიბდა სპეციალური შტაბი უშალოდ სტიქიასთან დაკავშირებით, შესაბამისი ცხელი ხაზი, შესაბამის შეტყობინების დატოვების შესაძლებლობით. მერიაში მოწყობილ ცხელ ხაზზე დაფიქსირდა შეტყობინება, რომ კონკრეტულ პიროვნებასთან ვერ ხდება კავშირი და ბუნებრივია, რომ ეს შოვთან დაკავშირებული ასპექტი არის.
გაკეთდა შეტყობინება, რომ ვერ ვუკავშირდებით ამა და ამ პიროვნებას. ეს მონაცემები იქნა ჩანიშნული და ავტომატურად აღნიშნული პიროვნება იქნა შეყვანილი დაკარგულთა სიაში" აღნიშნა ქარსელაძემ.
ამის შემდეგ, მინისტრის თქმითვე ვეღარ მოხერხდა დაკავშირება ინიციატორთან დეტალების დასაზუსტებლად, შესაბამისად ბიბილეიშვილი დაკარგულთა სიაში რჩებოდა.
"ამის იქეთ ხდება უკუკავშირი, რათა მოხდეს დეტალების დაზუსტდება. ამ დეტალების დასაზუსტებლად, როდესაც უკვე უნდა დაკავშირებოდნენ ინიციატორს, ეს კავშირი ვერ შედგა და შველა-ძიების სხვა დაკარგულ ადამიანებთან ერთად ამ სიაში, ეს პიროვნებაც იყო. პარალელურად, ვინაიდან დადასტურება ვერ მივიღეთ ამისა, არანაირი სხვა კომუნიკაცია ახლობლებიდან, ოჯახის წევრებიდან, არავისგან არ ყოფილა, ბუნებრივია ეს პიროვნება რჩებოდა ამ სიაში, მაგრამ დაიწყო ოპერატიულ სამძებრო მოქმედებები იმისათვის, რომ ნამდვილად დადასტურებული ყოფილიყო, რომ ის ნამდვილად დაკარგულია თუ არ არის." განმარტავს ქარსელაძე
ქარსელაძის თქმით, ინიციატორის დასადგენად ოპერატიულ სამძებრო მოქმედებები მიმდინარეობდა, მისი ვინაობა დადგინდა და მას სთხოვეს ინფორმაციის დაზუსტება დაკარგული პირის შესახებ. ქარსელაძის თქმით, გადამოწმების შემდეგ აღმოჩნა, რომ დაკარგულის შესახებ შეტყობინებაში სახელიც და გვარიც არასწორად იყო მითითებული
"ეს ოპერატიულ სამძებრო მოქმედებები ბოლო წუთამდე, დღემდე მიმდინარეობდა, ვიდრე ამის დასტური იქნებოდა, შესაბამისად, ეს პიროვნება რჩებოდა ისევ ამ სიაში. ოპერატიულ სამძებრო მოქმედებების შედეგად, მოხერხდა ინიციატორის დადგენა, ვისთანაც მოხერხდა უკუკავშირის და მას სთხოვეს დაეზუსტებინა .
როდესაც შემოდის ინფორმაცია დაკარგულებთან მიმართებაში, უკვე ხდება მათი ბაზების გადამოწმება და იმ გაცხადებული თავდაპირველად სახელით და გვარით, ასეთი პიროვნება ვერ მოიძებნა. ბუნებრივია ეს საფუძველი იყო ეჭვის, ვიდრე არ დადასტურდა. მაგრამ ამავდროულად, სიაში ეს ადამიანი არის, იმიტომ, რომ შეტყობინებაა შემოსული. პროცესი მიმდინარეობს, შესაბამისად, როგორც კი მოხერხდა ინიციატორთან დაკავშირება, დადგინდა, რომ არასწორად იყო მითითებული სახელი და გვარი, ხოლო როდესაც ამ ინიციატორმა გაასწორა და თქვა, რომ არა ეს სახელი და გვარი კი არა ეს სახელი და გვარია, უკვე მოხერხდა ამ პიროვნების ბაზებში დადგენა და უშუალოდ მასთან დაკავშირება, რომელმაც განაცხადა, რომ არ ვყოფილვარ საერთოდ შოვის ტერიტორიაზე, შესაბამისად ეს პიროვნება უკვე ამ დაკარგულთა სიაში აღარ არის" განაცხადა ქარსელაძემ.
შეგახსენებთ, დღეს , სამძებრო სამუშაოების მე-6 დღის ბოლოს, საგანგებო სიტუაციების მართვის სამსახურის ხელმძღვანელმა, თემურ მღებრიშვილმა ჟურნალისტებს განუცხადა, რომ ნაპოვნი იყო დაკარგულთა სიაში მყოფი ერთ-ერთი პირი, ზურაბ ბიბილეიშვილი. მისივე თქმით, ოპერატიული-სამძებრო სამუშაოების შედეგად ზურაბ ბიბილეიშვილი პოლიციამ თბილისში აღმოაჩინა.
