"ქართველი ხალხი მხარს უჭერს მოძმე ისრაელს, ასეთი ძალადობის ადგილი მსოფლიოში არ უნდა იყოს" - პაპუაშვილი
გამოქვეყნდა:
საქართველოს პარლამენტის თავმჯდომარე, შალვა პაპუაშვილი, ისრაელში განვითარებულ მოვლენებს X-ზე (ყოფილი Twitter) ეხმაურება და წერს, რომ ისრაელის სახელმწიფოს წინააღმდეგ განხორციელებული აგრესია მიუღებელია.
"გაუმართლებელი, სასტიკი და არაადამიანური აგრესია ისრაელის სახელმწიფოს წინააღმდეგ მიუღებელია. ქართველი ხალხი მხარს უჭერს მოძმე ისრაელს. ასეთი ძალადობის ადგილი მსოფლიოში არ უნდა იყოს," - წერს პაპუაშვილი.
ცნობისთვის, დღეს ღაზას სექტორიდან ისრაელზე მოულოდნელი სარაკეტო და სახმელეთო თავდასხმა წამოიწყეს. თავდასხმაზე პასუხისმგებლობა დაჯგუფება "ჰამასმა" აიღო და მას ოპერაცია "ალ-აკსას შტორმი" უწოდა.
ისრაელის შეიარაღებული ძალების ცნობით, ისინი "ჰამასის" წინააღმდეგ საპასუხო დარტყმებს ახორციელებენ - ქვეყანაში სამხედროების მობილიზება დაიწყეს და საომარი მდგომარეობა გამოაცხადეს.
ისრაელის ჯანდაცვის სამინისტროს მონაცემების მიხედვით, "ჰამასის" თავდასხმების შედეგად დაშავებულთა რიცხვი 545-მდე გაიზარდა. სასწრაფო დახმარების სამსახურის მონაცემებით კი, დაიღუპა სულ მცირე 22 ადამიანი.
