რუსი ოკუპანტების მიერ საქართველოს მოქალაქის მკვლელობა | ევროკავშირის სადამკვირვებლო მისიის განცხადება

რუსი ოკუპანტების მიერ საქართველოს მოქალაქის მკვლელობასთან დაკავშირებით ევროკავშირის სადამკვირვებლო მისია განცხადებას ავრცელებს, სადაც სოფელ კირბალთან საქართველოს მოქალაქის მამირთულებით სროლას ადასტურებს. 

EUMM "ყველა ჩართულ მხარეს თავშეკავების გამოჩენისა და შემდგომი ესკალაციის თავიდან ასაცილებლად ყველა საჭირო ზომის მიღებისკენ" მოუწოდებს.

"ევროკავშირის სადამკვირვებლო მისია ადასტურებს სოფელ კირბალის სიახლოვეს სროლას, საქართველოს მოქალაქის მამირთულებით, რომელმაც გამოიწვია მისი გარდაცვალება

ევროკავშირის სადამკვირვებლო მისია საქართველოში ადასტურებს, რომ სამხრეთ ოსეთის ადმინისტრაციულ სასაზღვრო ხაზზე მოხდა ინციდენტი, რომელმაც გამოიწვია საქართველოს მოქალაქის ტრაგიკულად გარდაცვალება. ღრმა მწუხარებას გამოვთქვამთ გარდაცვლილის ოჯახის და ახლობლების მიმართ.

ჩვენ უმკაცრესად ვგმობთ ძალის გამოყენებას ნებისმიერი ფორმით და გამოვთქვამთ ჩვენს უკიდურეს შეშფოთებას სროლის ინციდენტის გამო, რომელსაც მოჰყვა ადამიანის გარდაცვალება. რეგიონში მშვიდობის, უსაფრთხოებისა და სტაბილურობის შესანარჩუნებლად აუცილებელია მსგავსი ინციდენტების აღკვეთა.

მოვუწოდებთ ყველა ჩართულ მხარეს თავშეკავების გამოჩენისკენ და შემდგომი ესკალაციის თავიდან ასაცილებლად ყველა საჭირო ზომის მიღებისკენ. ჩვენ ყურადღებით ვაკვირდებით ვითარებას და ვმუშაობთ დაძაბულობის განმუხტვაზე, მათ შორის, სროლის შესახებ ინფორმაციის გაცვლის მიზნით ევროკავშირის სადამკვირვებლო მისიის მიერ მართული ცხელი ხაზის აქტიური გამოყენების გზით", - წერია განცხადებაში.

იხილეთ ასევე:

• რუსმა ოკუპანტებმა სოფელ კირბალთან საქართველოს მოქალაქე მოკლეს | სუს-ის განცხადება
• საქართველოს მოქალაქის მკვლელობა რუსი ოკუპანტების მიერ | ახალი დეტალები სოფელ კირბალიდან
• რუსი ოკუპანტების მიერ მოკლული საქართველოს მოქალაქე თამაზ გინტური, გატაცებული კი ლევან დოთიაშვილია