ნავალნის თანამოაზრეების ცნობით, პოლიტიკოსის ცხედარს ოჯახს კიდევ ორი კვირა არ გადასცემენ.
როგორც გამომძიებლებმა ალექსეი ნავალნის დედას და ადვოკატებს უთხრეს, ვიდრე ექსპერტიზა არ დასრულდება, რასაც სწორედ 2 კვირა დასჭირდება, ცხედარი მორგში დარჩება.
„გამომძიებლებმა ალექსეის ადვოკატებსა და დედას უთხრეს, რომ ცხედარს არ გადასცემდნენ. მას კიდევ 14 დღე (!) ჩაუტარდება რაიმე სახის „ქიმიური ექსპერტიზა“, - წერს ნავალნის პრესმდივანი კირა იარმიში.
შეგახსენებთ, რუსი ოპოზიციონერის ცხედრის გადაცემას მისი ადვოკატი და დედა მე-3 დღეა უშედეგოდ ითხოვენ. იმის მიუხედავად, რომ "ნოვაია გაზეტას" წყაროს მიხედვით, ნავალნის ცხედარი ქალაქ სალეხარდის მორგში გუშინ, 18 თებერვალს იპოვეს, ოჯახის წევრებს მისი ნახვის საშუალება ამ დრომდე არ ეძლევათ.
