პოლიციამ ბალდის კანიონთან მშენებლობის მოწინააღმდეგეებზე თავდამსხმელები, ძმები ხურცილავები დააკავა
გამოქვეყნდა:
მარტვილში, ბალდის კანიონთან მშენებლობის მოწინააღმდეგეებზე მომხდარ თავდასხმაში მონაწილე ორი ადამიანი პოლიციამ დააკავა. შსს-ს განცხადებით, დაკავებულები არიან ძმები - 1979 წელს დაბადებული გ.ხ. განზრახ მკვლელობის მცდელობის, ხოლო 1983 წელს დაბადებული გ.ხ. მუქარის ბრალდებით.
"მთავარის" ინფორმაციით, დაკავებულები არიან გელა და გიგა ხურცილავები.
დანაშაულები 15 წლამდე ვადით თავისუფლების აღკვეთას ითვალისწინებს.
"გამოძიებით დადგინდა, რომ ბრალდებულმა გ.ხ.-მ ურთიერთშელაპარაკების ნიადაგზე, ცივი იარაღის გამოყენებით თანასოფლელი 1991 წელს დაბადებული მ.ბ. დაჭრა, შემთხვევის დროს დაზიანება მიიღო 1992 წელს დაბადებულმა ა.ბ.-მაც. ასევე, დადგინდა, რომ ბრალდებულები, ცივი იარაღისა და სანადირო თოფის დემონსტრირებით ადგილობრივებს სიცოცხლის მოსპობით დაემუქრნენ", - წერია უწყების განცხადებაში.
გამოძიება სისხლის სამართლის კოდექსის 19-108-ე და 151-ე მუხლებით მიმდინარეობს, რაც განზრახ მკვლელობის მცდელობას და მუქარას გულისხმობს.
