"საქართველომ რუსეთთან ურთიერთობა თავად უნდა დაარეგულიროს" | ოკუპირებული აფხაზეთის ე.წ. საგარეო საქმეთა სამინისტრო კალაძის განცხადებაზე

ოკუპირებული აფხაზეთის ე.წ. საგარეო საქმეთა სამინისტრო შეახსენებს ქართველ პოლიტიკოსებს, რომ საქართველომ რუსეთთან ურთიერთობა თავად უნდა დაარეგულიროს - ამის შესახებ ე.წ. საგარეო უწყების განცხადებაშია საუბარი, რომელიც თბილისის მერის, კახა კალაძის განცხადებას ეხმაურება. 

"ცნობილია, რომ საქართველოსა და რუსეთს შორის დიპლომატიური ურთიერთობაც კი არ არის. ასე რომ, საარჩევნო კამპანიისას "საქართველს ტერიტორიულ მთლიანობასა" და სხვა მითიურ ტერმინებზე მცდარი სპეკულაციების ნაცვლად, ქართველმა პოლიტიკოსებმა რუსეთთან დიპლომატიური ურთიერთობების ჩამოყალიბება უნდა დაიწყონ. 

აფხაზეთსა და რუსეთს შორის ურთიერთობას, ჩვენი ქვეყნები სტრატეგიული მოკავშირეები არიან. აფხაზურ-რუსული ინტერსახელმწიფოებრივი ურთიერთობები საერთო სარგებლის მომტან ხელშეკრულებებსა და შეთანხმებებზეა დაფუძნებული, მათ შორის ისეთებზე, რომლებიც აფხაზეთში რუსული სამხედრო ბაზის არსებობას და აფხაზეთის რესპუბლიკის სახელმწიფო საზღვრის ერთობლივ დაცვას განსაზღვრავს. 

რაც შეეხება სამომავლოდ მეზობელ სახელმწიფო საქართველოსთან რაიმე სახის ურთიერთობის დამყარების შესაძლებლობას, ჩვენი პოზიცია უცვლელია - საქართველომ აფხაზეთის რესპუბლიკა სუვერენულ და დამოუკიდებელ სახელმწიფოდ უნდა აღიაროს და ხელი მოაწეროს იურიდიულად სავალდებულო დოკუმენტს ძალის გამოუყენებლობის შესახებ", - წერია განცხადებაში. 

იხილეთ ასევე:

• „საქართველოს დღევანდელი ხელმძღვანელობა სამართლიანად აფასებს წარსულს" | ლავროვის თქმით, მოსკოვი მზადაა "შეარიგოს საქართველო, აფხაზეთი და სამხრეთი ოსეთი"
• პოზიტიურად ვაფასებთ | კალაძე ლავროვის განცხადებაზე, რომელიც ოკუპირებულ აფხაზეთსა და ე.წ. სამხრეთ ოსეთს დამოუკიდებელ სახელმწიფოებად მოიხსენიებს