ენგურჰესის დირექტორი თანამშრომლებს პირადობის მოწმობებს ართმევს და ოკუპანტებთან მოლაპარაკებას აწარმოებს საარჩევნოდ ენგურის ხიდის ჩაკეტვაზე | წითლიძე
გამოქვეყნდა:
პარლამენტის წევრის, "ერთიანობა- ნაციონალური მოძრაობის" ზუგდიდის ორგანიზაციის თავმჯდომარის ინფორმაციით, ენგურჰესის დირექტორი ლევან მებონია, თანამშრომლებს პირადობის მოწმობებს ართმევს და რუს ოკუპანტებთან მოლაპარაკებას აწარმოებს ენგურის ხიდის ჩაკეტვაზე, რათა დევნილებმა არჩევნებში მონაწილეობა ვერ მიიღონ. ანა წითლიძის თქმით, არსებობს ამის მტკიცებულებები და ყველა საერთაშორისო მისიას უკვე გადასცეს.
"ჩვენ ვიცით ის ადამიანები, რომლებიც მონაწილეობენ პირადობების მოწმობების ჩამორთმევის პროცესში და ასრულებენ უკანონო დავალებებს. ერთ-ერთი მათგანი არის ლევან მებონია, ენგურჰესის დირექტორი, რომელიც შემჩნეულია ორ დანაშაულებრივ ქმედებაში.
პირველი: ლევან მებონიას დავალება აქვს, რომ ენგურჰესის თანამშრომელთა უმეტესობას, რომლებიც ოპოზიციურად არიან განწყობილი, ჩამოართვას პირადობის მოწმობები, რათა მათ ვერ შეძლონ არჩევნების დღეს უბნებზე მისვლა და ხმის მიცემა.
მეორე, უფრო მძიმე დანაშაული: ლევან მებონია არის მთავარი მომლაპარაკებელი რუს ოკუპანტებთან, რომ 24, 25 და 26 ოქტომბერს დაიკეტოს ენგურის ხიდი, რომ დევნილებს - საქართველოს მოქალაქეებს ოკუპირებული ტერიტორიიდან, არ მიეცეთ არჩევნებში მონაწილეობის საშუალება.
ჩვენ გვაქვს მტკიცებულებები, როგორ ავალებს ლევან მებონია ენგურჰესის თანამშრომლებს პირადობის მოწმობების ჩაბარებას, ასევე, გვაქვს მტკიცებულებები და უკვე გადავეცით საერთაშორისო ორგანიზაციებსა და ყველა სადამკვირვებლო მისიას, რომელიც არის რეგიონში, როგორ აწარმოებს ლევან მებონია მოლაპარაკებას რუს ოკუპანტებთან." განაცხადა წითლიძემ.
ის ენგურჰესის თანამშრომლებს მოუწოდებ, მიაწოდონ დამატებითი მტკიცებულებები მსგავს ფაქტებთან დაკავშირებით.
"ჩვენ დავიცავთ თითოეულ ადამიანს ლევან მებონიას უკანონო ბრძანებებისგან. "ქართულმა ოცნებამ" დაიწყო რეგიონში პირადობის მოწმობების ჩამორთმევის პროცესი მათთვის საეჭვო პოლიტიკური არჩევანის მქონე მოქალაქეებისთვის, ჩვენ ყოველდღიურ რეჟიმში ვიღებთ ინფორმაციას. კარგი ამბავი არის ის, რომ მოქალაქეების უმრავლესობა არ აძლევს პირადობის მოწმობებს ოცნების წარმომადგენლებს, ვინც აძლევს, უმრავლესობა სოციალურად დაუცველია და წარმოადგენს მოწყვლად ჯგუფს, რადგან მათ აშინებენ, რომ თუ პირადობის მოწმობებს არ ჩააბარებენ, მაშინ მოუხსნიან სოციალურ დახმარებას, მაგრამ წარმოუდგენელია, ქართულ ოცნებას ეყოს რესურსი, რომ პირადობის მოწმობები წაართვან მთელ ზუგდიდს, მთელ სამეგრელოს და სრულიად საქართველოს" - განაცხადა წითლიძემ.
