არ ვარ პოლიტიკოსი, არც მინდა გავხდე - ჟორჟოლიანი კანდიდატად მის დასახელებაზე
გამოქვეყნდა:
გადაცემა "სხვა ნანუკას" წამყვანი და ჟურნალისტი, ნანუკა ჟორჟოლიანი "ერთიანი ნაციონალური მოძრაობისა" და გაერთიანებული ოპოზიცია "ძალა ერთობაშიას" მიერ წყალტუბოსა და სამტრედიაში მაჟორიტარად მის წარდგენაზე საუბრობს. მისი თქმით, შეთავაზებაზე თანხმობა წარდგენამდე 2 საათით ადრე განაცხადა.
მთლიანობაში ამ ყველაფერს რომ ვუყურებდი, ამ დიდი რაღაცის ნაწილი არ მინდოდა, ვყოფილიყავი. პირველ რიგში, გადაწყვეტილების მიღების მთავარი საფუძველი იყო ის, რომ კარგად დამარწმუნეს იმაში, რომ ომია და არასოდეს ცხოვრების არცერთ ეტაპზე ომში წასვლაზე უარი არ მითქვამს... ომი ხომ ყოველთვის სხვადასხვაგვარია, პირდაპირი გაგებით ხომ არ უნდა წარმოვიდგინოთ და ვფიქრობ, რომ ამ არჩევნებზეც მთავარი ომის ხაზი გადის. მე არ ვარ პოლიტიკოსი და არც მინდა, ის გავხდე. მე მინდა, ვიყო ადამიანების იმედი, როგორც აქამდე ვიყავი, - ამბობს ჟორჟოლიანი.
ჟორჟოლიანმა აღნიშნა, რომ მაჟორიტარობაზე და პოლიტიკაში წასვლაზე შეთავაზება მანამდეც არაერთხელ მიუღია, თუმცა ამ დრომდე უარს ამბობდა, რადგან ქართული პოლიტიკის ნაწილი არ უნდოდა ყოფილიყო.
ცნობისთვის, საარჩევნო სისტემის ცვლილების შემდეგ, არჩევნები წელს 120/30 -ზე სისტემით ჩატარდება, რაც იმას ნიშნავს, რომ იქნება 30 მაჟორიტარული წესით (22 რეგიონებში, 8 - თბილისში) და 120 პროპორციული სიით არჩეული დეპუტატი.
რაც შეეხება საკონსტიტუციო ცვლილებებს, ის პარლამენტმა 117 ხმით 3-ის წინააღმდეგ, 29 ივნისს დაამტკიცა. ცვლილებათა პროექტი გულისხმობს ე.წ. 40%-იან ჩამკეტ მექანიზმსაც. პარტია, რომელიც 2020 წლის საპარლამენტო არჩევნებზე პროპორციული სისტემით 40.54%-ზე ნაკლებ მხარდაჭერას მიიღებს, მთავრობას დამოუკიდებლად ვერ დააკომპლექტებს.
