ცესკომ Smartmatic-ის ბრენდირებული მარკერები უკანონოდ და საკონტრაქტო პირობების დარღვევით არაბრენდირებულით ჩაანაცვლა | თინა ბოკუჩავა
გამოქვეყნდა:
თინა ბოკუჩავას თქმით, ცესკომ Smartmatic-ის ბრენდირებული მარკერები, რომლებიც ელექტრონული არჩევნებისას გამოიყენებოდა, უკანონოდ და საკონტრაქტო პირობების დარღვევით არაბრენდირებულით ჩაანაცვლა. ამის შესახებ "ერთიანობა ნაციონალური მოძრაობის" ლიდერმა, თინა ბოკუჩავამ თბილისის საქალაქო სასამართლოში ენმ-ს ცესკოს წინააღმდეგ სარჩელის განხილვის დაწყებამდე განაცხადა. მისი თქმით, სწორედ ეს არაბრენდირებული მარკერები ტოვებდა კვალს, რომლის საფუძველზეც ილახებოდა ფარულობის და შესაბამისად თავისუფალი ნების კონსტიტუციური პრინციპები.
"ჩვენ წარმოვადგენთ ძალიან ბევრ, მნიშვნელოვან მტკიცებულებას და კიდევ ერთხელ მოვითხოვთ არჩევნების შედეგების სრულ ბათილობას, მათ შორის, კონსტიტუციის სამი პრინციპის დარღვევის საფუძველზე, ეს არის ფარულობა, თავისუფალი ნების გამოხატვა და საყოველთაობა. სამივე პრინციპის დარღვევას ჰქონდა ადგილი ტოტალურად 26 ოქტომბრის არჩევნებზე.
ცესკომ სრულიად უკანონოდ და საკონტრაქტო პირობების დარღვევით Smartmatic-ის ბრენდირებული მარკერები, წინა დღით ჩაანაცვლა არაბრენდირებული მარკერებით, რომელსაც მტკიცებულების სახით წარვადგენთ, დღეს, ჩვენ სასამართლოზე, სხვა მტკიცებულებებთან ერთად. მარკერი ტოვებდა სწორედ იმ კვალს, რომლის საფუძველზეც ილახებოდა ფარულობის და შესაბამისად თავისუფალი ნების გამოხატვის კონსტიტუციური პრინციპები," - განაცხადა თინა ბოკუჩავამ.
