უწყვეტი პროტესტი თსუ-სთან | აქციის მონაწილეებმა ღამე ჭავჭავაძის გამზირზე გაათენეს
გამოქვეყნდა:
თბილისის სახელმწიფო უნივერსიტეტის პირველი კორპუსის მიმდებარედ უწყვეტი საპროტესტო აქცია გრძელდება. სამოქალაქო აქტივისტებმა, მოქალაქეებმა და პროდასავლური ოპოზიციური პარტიების წარმომადენლებმა ღამე ჭავჭავაძის გამზირზე გაათენეს.
გზის სავალ ნაწილზე ამ დრომდე ათობით კარავია განთავსებული - ცნობილია, რომ ამ სახით პროტესტი საღამოს 8 საათამდე გაგრძელდება. შემდგომი სამომავლო გეგმა კი, როგორც ოპოზიციის წევრები ამბობენ, სწორედ ამის შემდეგ გამოცხადდება.
"ძალა ერთობაშია! საღამოს 8 საათამდე აქ ვართ!", - მიმართა აქციის მონაწილეებს "ერთიანობა - ნაციონალური მოძრაობის" ერთ-ერთმა ლიდერმა, გიორგი ვაშაძემ.
შეგახსენებთ, რომ 17 ნოემბერს, "კოალიცია ცვლილებისთვის" წარმომადგენლებმა, რომლებიც საპროტესტო მსვლელობით ვაკის პარკიდან რუსთაველის გამზირამდე მიდიოდნენ, მოულოდნელად დანიშნულების ადგილი შეცვალეს, თსუ-ს პირველ კორპუსთან შეჩერდნენ და დაუმორჩილებლობის პროტესტის დაწყების შესახებ განაცხადეს:
მოგვიანებით მათ რუსთაველის გამზირზე მიმდინარე აქციის მონაწილეებიც შეუერთდნენ.
ფოტო: ბაჩანა საჯაია
