"დავბანაკდებით ისევ აქ" - ოპოზიცია თსუ-სთან დაბრუნდა
გამოქვეყნდა:
ოპოზიცია, საპროტესტო აქციის მონაწილეებთან ერთად, ისევ თბილისის სახელმწიფო უნივერსიტეტთან დაბრუნდა.
"კოალიცია ცვლილებისთვის" ერთ-ერთი ლიდერის, ელენე ხოშტარიას თქმით, კვლავ თსუ-სთან დაბანაკდებიან.
"გაიწევა პოლიცია, გაიწევა "ოცნებაც" და გაიწევა რუსეთიც ამ ქვეყნიდან... დავბანაკდებით ისევ აქ", - თქვა ხოშტარიამ.
მანამდე აქციის მონაწილეები მელიქიშვილის გამზირზე იმყოფებოდნენ, თუმცა, აქციის მონაწილეების რაოდენობის გამო, პოლიციამ უკან დაიხია.
შსს-მ დღეს, მშვიდობიანი დემონსტრანტების დარბევის შემდეგ, მელიქიშვილზე დაკავებები დაიწყო. უწყების ცნობით, ჯამში 16 პირი დააკავეს ადმინისტრაციულად, მათგან სამი ხელწერილით გაათავისუფლეს.
დაკავებულებს შორის იყო "მთავარი არხის" ოპერატორი სერგი ბარამიძე. მას სამართალდამცველები ფიზიკურად გაუსწორდნენ. ბარამიძე კახეთის გზატკეცილზე მდებარე შსს-ს შენობაში გადაიყვანეს, საიდანაც ხელწერილით რამდენიმე საათის შემდეგ გაათავისუფლეს.
