ქალბატონმა თეამ გააკეთა ძალიან მკაფიო განცხადება; ეს არის ობიექტური მოცემულობის გახმოვანება | კობახიძე

ფაქტის კონსტატაცია და  ობიექტური მოცემულობის გახმოვანება - ასე აფასებს "ოცნების" პრემიერი რეჟიმის წარმომადგენლის, თეა წულუკიანის განცხადებას ეროვნულ გმირზე, გიორგი ანწუხელიძეზე.

კობახიძემ, პროპაგანდისტული ტელევიზიების ჟურნალისტებთან ისევ რუსული პროპაგანდისტული განცხადება გააკეთა:

"რეალურად, ქალბატონმა თეამ გააკეთა ძალიან მკაფიო განცხადება. ყველამ ვიცით ძალიან კარგად, არათუ ამ ომის თავიდან აცილება შეიძლებოდა , არამედ ეს ომი დაიწყო სააკაშვილის რეჟიმმა, რასაც მერე ხელი მოაწერეს, თავადვე აღიარეს. შესაბამისად, როდესაც საუბრობს თეა წულუკიანი იმაზე  რომ შეიძლებოდა ამ ომის თავიდან არიდება , რომ შესაძლებელი იყო ჩვენი გმირები დღეს ყოფილიყვნენ ცოცხალი და ეზრუნათ საკუთარ ოჯახებზე, ეს არის უბრალოდ ფაქტის კონსტატაცია. ეს არის იმ ობიექტური მოცემულობის გახმოვანება , რომელთანაც გვაქვს საქმე. რა თქმა უნდა, რომ არა ის დაკვეთა, რომელიც მიიღო სააკაშვილის რეჟიმმა და შეასრულა , არ იქნებოდა არც ომი და არც მსხვერპლი და ზუსტად ამაზე გაამახვილა ყურადღება თეა წულუკიანმა. აბსოლუტურად ნათელია აქ და ცხადია ყველაფერი. " თქვა კობახიძემ. 

შეგახსენებთ, "ოცნების" რეჟიმის საგამოძიებო კომისიის ხელმძღვანელმა წულუკიანმა, რუსი ოკუპანტების მიერ წამებით მოკლულ ეროვნულ გმირს, გიორგი ანწუხელიძეს "უაზროდ განწირული" უწოდა.