"ევროპული საქართველოს" კლიპი მიხეილ სააკაშვილის მონაწილეობით - პარტია მარეგულირებელს რეგულაციის დროებით გაუქმებას სთხოვს

"ევროპული საქართველო" ტელეკომუნიკაციების მარეგულირებელ კომისიას გამონაკლისის სახით, წინასაარჩევნო  რეგულაციის  დროებით, არჩევნებამდე გაუქმება მოსთხოვა.  

სერგი კაპანაძის თქმით, ტელეკომპანიების, მათ შორის "მთავარი არხის" ეთერში  მარეგულირებლის რეგულაციის გამო ვერ მოხვდა მათი პარტიული წინასაარჩევნო ვიდეორგოლი, სადაც ქვეყნის მესამე პრეზიდენტი, მიხეილ სააკაშვილი ჩანს.

„რამდენიმე დღის წინ ევროპულმა საქართველომ გაუშვა წინასაარჩევნო კლიპი, ეს კლიპი ჯერ კიდევ არ განუთავსებია ორ ტელევიზიას, "მთავარს" და "იმედს". ჩვენ, მივმართავთ მარეგულირებელ კომისიას, უმოკლეს ვადაში, გააკეთოს, საღი აზრის ფარგლებში, ერთადერთი სწორი განმარტება და ინტერპრეტაცია, რომელიც ამ საკითხზე შეიძლება არსებობდეს და დართოს ნება რომ ეს კლიპი იყოს გაშვებული.“ ამბობს კაპანაძე.

"მთავარი არხის" იურისტი ამბობს, რომ ტელევიზიამ გადაწყვეტილება, არ გაეშვა კლიპი ეთერში, მარეგულირებლიდან მოსალოდნელი სანქციების გამო მიიღო

„ჩვენი გადაწყვეტილება, არ იყო გამომდინარე იქიდან, რომ ჩვენ მოვისურვეთ ასე. ჩვენ გვაქვს გარკვეული შიშები, იმისა, რომ მარეგულირებელი კომისია თავისი მანკიერი პრაქტიკიდან გამომდინარე დაასანქცირებდა მაუწყებელს ერთგვარი რეკლამის განთავსების გამო. ეს წლების განმავლობაში ხდება მარეგულირებელი კომისიის მხრიდან, რომ კანონის არასწორ ინტერპრეტაციას აკეთებს, რეალურად ასანქცირებს მედიას და ამით პრაქტიკულად უზღუდავს პოლიტიკური გამოხატვის თავისუფლებას." ამბობს მთავარი არხის იურისტი თამთა მურადაშვილი.

ახალი რეგულაციის მიხედვით, წინასაარჩევნო ვიდეორგოლში უცხო ქვეყნის მოქალაქის ეთერში გამოჩენა აკრძალულია.