ხმას თუ გავიგონებ, შეიძლება მივამსგავსო - კვარაცხელიას პირველი კომენტარი დაკითხვის შემდეგ და 7 საათიანი მძევლობის დეტალები
გამოქვეყნდა:
ზუგდიდის რაიონულ პოლიციაში მთელი ღამე კითხავდნენ გათავისუფლებულ მძევლებს. მათ შორის, ერთ ერთი იყო ირაკლი კვარაცხელია, რომელიც დაკითხვიდან გამოსვლის შემდეგ ერთადერთი იყო, რომელმაც მედიასთან კომენტარი გააკეთა და 7 საათიანი მძიმე პერიოდი გაიხსენა.
კვარაცხელია ამბობს, რომ თავდამსხმელი პირველ ეტაპზე აგრესიული იყო და რამდენჯერმე გაისროლა კიდეც.
მისივე თქმით, ბანკიდან გამოსვლის წინ, შეიარაღებულმა პირმა თავად აარჩია ერთი პირი, რომელიც მასთან ერთად უნდა წასულიყო, ხოლო ორმა მძევალმა საკუთარი ნებით მიიღო ეს გადაწყვეტილება.
ერთ ერთი პირი, რომელიც შეიარაღებულ თავდამსხმელს ბანკიდან გამოსვლის შემდეგ გაჰყვა, სამხარეო პოლიციის უფროსი, ავთანდილ გალდავა იყო.
თავიდან იყო ძალიან აგრესიული, მაგრამ მძევლად ვინც იყო ყველამ ერთად მოახერხა ის, რომ კომუნიკაბელური გახდა. წაიყვანა ბიჭები, ორმა თვითონ გამოთქვა სურვილი, მესამე თვითონ დაასახელა. ნიღბის გარეშე არ ყოფილა არც ერთი წუთი... ხმას თუ გავიგონებ, შეიძლება მივამსგავსო...
სამართალდამცავებთან მოლაპარაკებები მიმდინარეობდა სხვა მძევლის დახმარებით. ჰქონდა ტელეფონი ხმამაღლა ჩართული და ეუბნებოდა, რა პასუხი უნდა გაეცა. იყო შემთხვევები, როცა თავადაც ერთვებოდა საუბარში.
რადგან მე დავალებული მქონდა მედიასთან დარეკვა, ვნახე რომ სრულიად კატასტროფული და ამორალური კამპანია წამოიწყო გარკვეულმა ჯგუფებმა - ამბობს ირაკლი კვარაცხელია.
ამ დრომდე უცნობია სად იმყოფება ნახევარი მილიონი დოლარითა და ხელყუმბარით ხელში ბანკიდან პოლიციის უფროსთან და კიდევ სამ მძევალთან ერთად გამოსული თავდამსხმელი, რომელმაც მანამდე 43 ადამიანი მძევლად აიყვანა და დაახლოებით შვიდი საათის შემდეგ ბანკი დატოვა.
ამ დროისათვის ყველა მძევალი, მათ შორის პოლიციის მაღალჩინოსანი ავთანდილ გალდავა თავისუფალია. მათ ჯანმრთელობას საფრთხე არ ემუქრება.
ვრცელდებოდა ინფორმაცია იმის შესახებ, რომ თავდამსხმელი ოკუპირებული აფხაზეთის ტერიტორიაზე გეგმავდა გადასვლას, თუმცა ინფორმაცია ჯერჯერობით არ არის დადასტურებული.
- გალდავას უშუალო ძალისხმევით ყველა მძევალი გათავისუფლდა - შსს
- პოლიციის უფროსი და კიდევ ორი მძევალი თავისუფალია, თავდამსხმელი დაკავებული არ არის
თავდასხმა ზუგდიდის ცენტრში გუშინ, 21 ოქტომბერს 14 საათსა და 21 წუთზე დაიწყო, მაშინ, როდესაც სამხედრო ფორმაში ჩაცმული და შენიღბული თავდამსხმელი, ცეცხლსასროლი იარაღითა და ხელყუმბარით ხელში, საქართველოს ბანკის ფილიალში შეიჭრა. მალევე რამდენიმე მძევალმა თავის დაღწევა შენობის სახურავიდან, სახანძრო კიბით მოახერხა, რის შემდეგაც, თავდამსხმელმა მძევლები იზოლირებულ ოთახში გადაიყვანა და ხელისუფლებას ულტიმატუმის შესასრულებლად 2 საათი განუსაზღვრა- ნახევარი მილიონი დოლარი და უსაფრთხო სატრანსპორტო დერეფანი ავტომობილით ან ვერტმფრენით, უდანაშაულო მძევლების თავისუფლების სანაცვლოდ.
