"ივანიშვილმა სპეცოპერაცია ჩაატარა" - ოპოზიცია დღეს 4 საათზე რუსთაველზე შეიკრიბება

"ივანიშვილმა ჩაატარა სპეცოპერაცია, ეს არჩევნები ლეგიტიმურად ვერ ჩაითვლება " - ასეთია ოპოზიციის ლიდერების განცხადებები და დღეს, 4 საათზე ამომრჩევლის ხმების დასაცავად რუსთაველზე შეიკრიბებიან. 

"ერთიანი ნაციონალური მოძრაობის" წევრი, თინა ბოკუჩავა ამბობს, რომ ყველა დიდ ოლქში ოპოზიცამ გაიმარჯვა. 

"გუშინ, მთელი ღამის განმავლობაში მიმდინარეობდა არჩევნების წარმოუდგენელი გაყალბების პროცესი, რამაც გააჭიანურა ცესკოს მხრიდან არჩევნების გამოცხადება, განსაკუთრებით ეს ხდებოდა დიდ ქალაქებში, იმიტო, რომ დიდ ქალაქებში ყველაზე დამაჯერებლად გაიმარჯვა ოპოზიციამ, მუდმივ კოორდინაციაში ვართ სხვა ოპოზიციურ პარტიებთან, კონსულტაციები აქტიურ რეჟიმში დაიწყო გუშინ ღამევე, დღეს ვაგრძელებთ ამ კონსულტაციებს და 4 საათზე ყველას - ახლა უმთავრესია, რომ დავიცვათ ჩვენი არჩევანი," - ამბობს თინა ბოკუჩავა. 

"ერთიანი საქართველოს დემოკრატიული მოძრაობის" პოლიტიკური საბჭოს წევრის, ანზორ ბიწაძის თქმით, ახლა ივანიშვილი ზოგიერთ პარტიას ორ ან მეტ მანდატს მისცემს. 

"ეს იყო სპეცოპერაცია ქართველი ხალხის ნების წინააღმდეგ, სრულიად პოლიტიკური სპექტრის წინააღმდეგ, ამ ამბავს გამარჯვებული არ ჰყავს, ახლა მიმდინარეობს გარკვეული მანიპულირება პროცენტებით იმისთვის, რომ ივანიშვილმა ზოგიერთ პარტიებს შესთავაზოს, რომ ერთ-ორ მანდატს გადაუგდებს" - ამბობს ანზორ ბიწაძე

"ევრუპული საქართველოს" პოლიტიკური საბჭოს წევრი, გიორგი კანდელაკი ამბობს, რომ ამ "ოცნების" მხრიდან დარღვევებს, ზეწოლას, მოსყიდვას, ფულის დარიგებასა და უსამართლობას ოპოზიცია არ შეეგუება.