კიდევ ერთხელ ვიმეორებთ ჩვენ მყარ პოზიციას - ოპოზიციის საერთო განცხადება
გამოქვეყნდა:
ოპოზიციური პარტიები ერთიან განცხადებას ავრცელებენ და წერენ, რომ ისინი კვლავ არ აპირებენ გაყალბებული არჩევენბის აღიარებას, მეორე ტურში მონაწილეობასა და არალეგიტიმურ პარლამენტში შესვლას.
ოპოზიცია აცხადებს, რომ მზადაა გრძელვადიანი, მშვიდობიანი პროტესტი გააგრძელოს და საკუთარ მოთხოვნებსაც უცვლელად ტოვებს. გთავაზობთ განცხადებას სრულად:
ივანიშვილის რეჟიმმა უკვე ბევრჯერ გვაჩვენა, რომ აპირებს უკანონო ძალის გამოყენებით ხელისუფლების შენარჩუნებას. ცესკოს წინ მშვიდობიანი მანიფესტანტების დარბევა წყლის ჭავლით და გუშინ სამოქალაქო აქტივისტების უკანონო დაკავება წარმოადგენს ამ არალეგიტიმური რეჟიმის ქვეყნისთვის სახიფათო რეაქციას მშვიდობიან პოლიტიკურ და სამოქალაქო პროტესტზე.
ჩვენ კიდევ ერთხელ ვიმეორებთ ჩვენს მყარ პოზიციას, რომ არ ვაპირებთ გაყალბებული არჩევნების შედეგების აღიარებას, მეორე ტურებში მონაწილეობას და არალეგიტიმურ პარლამენტში შესვლას.
ჩვენ ვაგრძელებთ მშვიდობიან პროტესტს გაყალბებული არჩევნების წინააღმდეგ. ჩვენი მოთხოვნები უცვლელია - არჩევნების ხელახლა ჩატარება, ცესკოს ადმინისტრაციის შეცვლა და პოლიტპატიმრების გათავისუფლება. სწორედ ამ საკითხზე უნდა გაიმართოს დიალოგი ივანიშვილის რეჟიმთან საქართველოს საერთაშორისო მეგობრების შუამავლობით.
მოვითხოვთ შსს-სგან არ დაუშვან პოლიციური ძალების ახლო კონტაქტი მომიტინგეებთან, რადგან მათი კომპეტენცია და გამოცდილება არაა საკმარისი ამ ტიპის ვითარების ეფექტურად და კანონის ფარგლებში სამართავად.
მოვუწოდებთ მშვიდობიან მანიფესტანტებს, მათ შორის ნებისმიერი პოლიტიკური ჯგუფის მხარდამჭერებს, რომლებიც სამართლიანად არიან აღშფოთებული გაყალბებული არჩევნების და ხელისუფლების მხრიდან ძალადობის გამო, არ შევიდნენ ფიზიკურ კონფრონტაციაში პოლიციასთან. ნებისმიერი ვინც ასე არ მოიქცევა, თავად გაემიჯნება მშვიდობიან პროტესტს.
ჩვენ მზად ვართ გრძელვადიანი და მშვიდობიანი პროტესტისთვის. ჩვენი პროტესტის ძალა მშვიდობიან ქმედებებშია. ოპოზიციის საერთო შეთანხმებით პროტესტის შემდგომი ადგილი იქნება საპროტესტო აქცია 14 ნოემბერს თბილისში, ხოლო 21 ნოემბერს, გაყალბებული არჩევნების მეორე ფიქტიური ტურების დროს, მშვიდობიანი, ცოცხალი ჯაჭვი.
განცხადებას ხელს აწერს "გირჩი", "ევროპული საქართველო", "ლელო" და "სტრატეგია აღმაშენებელი". ცოტახანში ამ განცხადებას დაეთანხმა გაერთიანებული ოპოზიცია "ერთიანი ნაციონალური მოძრაობის" წევრი, ნუგზარ წიკლაურიც და გადაცემა "დღის სტუამარში" დაადასტურა, რომ პარტია იგივე პოზიციაზეა.
შეგახსენებთ, რომ გაურკვევლობა ოპოზიციას შორის ენმ-ს ერთ-ერთი ლიდერის, გრიგოლ ვაშაძის განცხადებას მოჰყვა. შეგახსენებთ, რომ დღეს გრიგოლ ვაშაძემ განცხადება გაავრცელა, რომლითაც პარტიებს პოლიტიკური საკითხების მოლაპარაკებების მაგიდასთან განხილვისკენ მოუწოდა.
მას შემდეგ, რაც განცხადებას აზრთა სხვადასხვაობა მოჰყვა, ვაშაძემ დამატებით განმარტა, რომ მოქალაქეთა პროტესტი უნდა გაგრძელდეს და მას პოლიტიკური კომპონენტიც უნდა დაემატოს - სამართლიანი არჩევნების პრინციპების განხორციელების თაობაზე მოლაპარაკებების სახით სტრატეგიული მოკავშირეების მედიაციით.
