სასამართლო უნდა გათავისუფლდეს კლანისგან და ნეპოტიზმისგან - 5 გზა რეფორმირებისთვის

იუსტიციის უმაღლესი საბჭოს არამოსამართლე წევრი, ნაზი ჯანეზაშვილი, აშშ-ის სენატში სასამართლოსთან დაკავშირებთ გაკეთებულ განცხადებებს გამოეხმაურა. ჯანეზაშვილის თქმით, სენატორების გამოსვლამ კიდევ ერთხელ დაადასტურა, რომ "საქართველოს სასამართლოს სჭირდება ფუნდამენტური რეფორმები და განახლება".

ჯანეზაშვილმა დღეს ის 5 საკითხი დაასახელა, რომელიც მისი თქმით, სასამართლო რეფორმის დასაწყებად და პრობლემების გადასაჭრელადაა აუცილებელი

1. კლანური მმართველობისგან სასამართლოს გათავისუფლება - ვერ წარმომიდგენია სასამართლოს განვითარების პერსპექტივა იმ შემთხვევაში, თუ ამ სასამართლოში ლიდერებად დარჩებიან მურუსიძე-ჩინჩალაძე და სხვა ის პირები, რომლებმაც მოგვიტანეს ის მძიმე შედეგები, რაც სასამართლოშია. სასამართლო უნდა გათავისუფლდეს კლანური მმართველობისგან.
2. სასამართლოს ნეპოტიზმისგან გათავისუფლება - როგორც აპარატის, ასევე მოსამართლეების დონეზე.
3. საქმეთა განაწილების წესის შეცვლა და სისტემური ანალიზი - მიუხედავად იმისა, რომ არსებობს ელექტრონული განაწილების სისტემა, ვფიქრობ, ეს საკითხი საჭიროებს გადახედვას და საკანონმდებლო ცვლილებებს. არ შეიძლება მიხეილ ჩინჩალაძეს ჰქონდეს შესაძლებლობა, ერთპიროვნულად შეცვალოს მოსამართლეთა შემადგენლობა.
4. საქმეთა გაჭიანურება - მოქალაქეები დადიან იუსტიციის უმაღლეს საბჭოში, სასამართლოებში, მაგრამ ისინი წლების განმავლობაში ვერ აღწევენ შედეგებს. ამიტომ მნიშვნელოვანია, რომ საქმეთა განაწილების პრინციპის შემდგომ გადაიხედოს, როგორ მიმდინარეობს პროცესები და რატომ ჭიანურდება საქმეები.
5. მთლიანად სასამართლო სისტემის მოწყობა, ინსტიტუციური და ორგანიზაციული მხარე - ფაქტია, რომ დღევანდელი სასამართლო ვერ პასუხობს მოთხოვნებს, რომელიც საზოგადოებაშია და არის თანამედროვე საზოგადოებაში ყველაზე აქტუალური. დღევანდელი სასამართლო სისტემა უნდა გადაიხედოს ორგანიზაციულად, მენეჯმენტი დაიხვეწოს ისე, რომ ჩვენი ქვეყნის მოქალაქეებს ეფექტიანად ემსახურებოდეს", - თქვა ჯანეზაშვილმა.

შეგახსენებთ, რომ 23 მარტს ამერიკის სენატში, საგარეო კომიტეტის სხდომაზე საქართველოში მიმდინარე პოლიტიკურ კრიზისზე დებატები გაიმართა. 

ამავე თემაზე:

• ყოველი დღე, როდესაც ოპოზიციონერები არიან ციხეში, არის გამარჯვება რუსეთისთვის - სენატორი შაჰინი
• მელიას დაკავებამ კრიზისი გაამწვავა - ჯორჯ კენტი
• ზეწოლა სამოქალაქო საზოგადოებასა და მედიაზე, რუსეთის წისქვილზე ასხამს წყალს - მაკდონალდი
• პოლიტიკურ ცხოვრებაზე, მედიასა და მართლმსაჯულებაზე ოლიგარქიული გავლენა იზრდება - სენატორი რიში