სასურველია შეიქმნას სახელმწიფო კომისია - ზურაბიშვილის "ნამოხვანჰესის" მშენებლობაზე

საქართველოს პრეზიდენტის, სალომე ზურაბიშვილის აზრით, სასურველია "ნამახვანჰესის" მშენებლობასთან დაკავშირებით სახელმწიფო კომისია შეიქმნას. ამ თემაზე მან პარლამენტში ყოველწლიური მოხსენების დროს ისაუბრა. 

პრეზიდენტის აზრით, კომისიაში ეკონომისტები, ენერგეტიკოსები, ბუნებადამცველები, ადგილობრივი მოსახლეობა და უცხოელი ექსპერტები უნდა გაერთიანდნენ.

"ერთის მხრივ ის საზოგადოება, ვისი წუხილიც ძალიან კარგად მესმის და ვუთანაგრძნობ, ითხოვს ჩვენი ბუნებრივი რესურსებისა და მიწის დაცვას უხეში ჩარევისა და ზემოქმედებისგან. ადგილობრივი მოსახლეობა აპელირებს იმ საფრთხეებზე, რომელიც ემუქრება ზოგადად ეკოლოგიას, რეგიონში სოფლის მეურნეობას, მეღვინეობისა და ტურიზმის პოტენციალს. მეორე მხრივ კი, ვინც ინვესტიციების მოზიდვას, ეკონომიკის გაცოცხლებასა და ენერგო-დამოუკდიებლობას ანიჭებს უპირატესობას და ადამიანის სიდუხჭირიდან თავის დაღწევაზე აპელირებს. ორივე მხარეს აქვს ძლიერი არგუმენტები. უალტერნატივოდ მიმაჩნია ორივე მოსაზრების გათვალისწინება და შეჯერება. ამისათვის საჭიროა მეტი კომუნიკაცია, მეტი საჯაროობა, მეტი გაანალიზება ყველა არგუმენტის და ყველა შესაძლო საფრთხის. სასურველია შეიქმნას სახელმწიფო კომისია, სადაც ეკონომისტები, ენერგეტიკოსები, ბუნებადამცველები, ადგილობრივი მოსახლეობა და უცხოელი ექსპერტები ერთად განიხილავენ არა მხოლოდ ამ კონკრეტული ჰესის ბედს, არამედ მომავალ გეგმებსა და პერსპექტივას ენერგეტიკის მიმართულებით", - თქვა სალომე ზურაბიშვილმა. 

ზურაბიშვილის თქმით, მსჯელობა მაქსიმალურად გასაჯაროვებული უნდა იყოს და თუ საჭიროდ ჩაითვლება ის მზადაა პრეზიდენტის სასახლის პლატფორმა ამ მიზანს დაუთმოს.