შინაგან საქმეთა სამინისტროს ქართლის პოლიციის დეპარტამენტის ხელმძღვანელი, ლაშა გოგნიაშვილი ამბობს, რომ დმანისში ვითარება განმუხტულია. თუმცა მანვე აღნიშნა, რომ ადგილზე განსაკუთრებული დავალებათა დეპარტამენტის თანამშრომლები იმყოფებიან და დამატებით ძალები ისევ ემატებიან.
გოგნიაშვილმა ასევე თქვა, რომ ამ ეტაპზე ორივე მხარის გამოკითხვა მიმდინარეობს ჯერჯერობით უცნობია სულ რამდენი პირია დაკავებული.
"მიმდინარეობს საგამოძიებო მოქმედებები. ამ ეტაპზე, მიმდინარეობს ადამიანების გამოკითხვა. რამდენი ადამიანია დაკავებული ინფორმაცია არ გვაქვს, დამატებით კომენტარს გააკეთებს შინაგან საქმეთა სამინისტროს პრესცენტრი.
მიმდინარეობს მოქალაქეების გამოკითხვა, როგორც ერთი მხარის ასევე მეორე მხარის.
შინაგან საქმეთა სამინისტრო მაქსიმალურად ვაკეთებდით ყველაფერს, რომ შეხლა-შემოხლა არ ყოფილიყო. ჩვენ განვაიარაღეთ მაქსიმალურად ყველა და ყველაფერი გავაკეთეთ რომ საზოგადოებრივი მშვიდობა შეგვენარჩუნებინა.
განსაკუთრებულ დავალებათა დეპარტამენტის ბევრი თანამშრომელია ადგილზე, გუშინაც იყო, დღესაც არის და დღესაც ემატება ძალები. ვითარება განმუხტულია... დამშვიდდით დაწყნარდით",- თქვა ლაშა გოგნიაშვილმა.
დღეს დილიდან განახლდა დაპირისპირებაა დმანისში ადგილობრივ აზერბაიჯანულ თემსა და ე.წ. ეკომიგრანტთა თემს შორის. ადგილზე სიტუაცია მას შემდეგ დაიძაბა, რაც ადგილობრივი ეთნიკური აზერბაიჯანული თემის წარმომადგენლებმა აქციის გამართვა დააპირეს. ისინი გუშინდელი ინციდენტის გამოძიებას და მასში მონაწილეების დასჯას ითხოვდნენ.
ორივე მხარეს მოქალაქეები ქვებით და ხელკეტებით არიან შეარაღებულნი. დაშავებულია რამდენიმე ადამიანი, მათ შორისაა სამართალდამცავიც.
შეგახსენებთ, რომ 16 მაისს დმანისში, 9 აპრილის ქუჩაზე, ადგილობრივ აზერბაიჯანულ თემსა და სვანეთიდან ჩასახლებულ ეკომიგრანტებს შორის დაპირისპირება მოხდა. ახალგაზრდები ერთმანეთს ჯოხებითა და ბიტებით დაუპირისპირდნენ, დაზიანდა ახლომდებარე მაღაზიებიც.
ამავე თემაზე:
- დმანისში ადგილობრივებმა პოლიციასთან გადაინაცვლეს - ისინი დაკავებულების გამოშვებას ითხოვენ
- ასეთი რამ 4-წლიანი მერობის პერიოდში პირველად ვნახე - დმანისის მერი დაპირისპირებაზე;
- ლუდი მოითხოვეს "ნისიად" - მაღაზიის გამყიდველი დმანისში მომხდარ დაპირისპირებაზე;
- დაიცავით კანონის მოთხოვნები და შეინარჩუნეთ სიმშვიდე - შსს-ს განცხადება დმანისზე.
