მანქანიდან 12 მედიკამენტია ამოღებული, აქედან 8 არის ვადაგასული, დანარჩენი 4-დან ექსპერტიზა მხოლოდ 1-ზე მოითხოვეს - რამიშვილი ბაჩალიაშვილის საქმეზე
გამოქვეყნდა:
"მთავარი არხის" ეთერში, გადაცემაში "დღის სტუმარი" თამარ ბაჩალიაშვილის ოჯახის ადვოკატი მიხეილ რამიშვილი, გარდაცვლილი პროგრამისტი გოგოს საქმეში არსებულ დეტალებს იხსენებს. ამბობს, რომ თამარ ბაჩალიაშვილის მანქანიდან რამდენიმე სხვადასხვა დასახელების მედიკამენტი ამოიღეს, თუმცა გამოძიების პროცესში, როდესაც საგამოძიებო უწყებებმა დადგენილება სამედიცინო ექსპერტიზის დანიშვნის შესახებ გადააგზავნეს, მხოლოდ ერთი მედიკამენტი მიუთითეს და გამოძიებამ ორგანიზმში მხოლოდ ერთი მედიკამენტის კვალის გამოკვლევა მოითხოვა.
გაინტერესებს ერთადერთი მედიკამენტი, რომელიც ამის შემდეგ ვერ დაადგინეს სად შეიძინა, როდის შეიძინა, ვერ დაადგინეს, რომ რეცეპტის გარეშე არ გაიცემა და დღემდე, როდესაც მოვითხოვეთ
ექსპერტიზა იმ მედიკამენტებზე, რომლების ცარიელი ფირფიტებით თამარ ბაჩალიაშვილს ჰქონდა, არ ჩაატარეს. ერთ მედიკამენტზე იყვნენ ორიენტირებულები, - ამბობს ადვოკატი.
მისივე თქმით, ეს მედიკამენტი არცერთ აფთიაქში თამარ ბაჩალიაშვილს არ უყიდია.
12 მედიკამენტია ამოღებული მანქანიდან. 12-დან 8 არის ვადაგასული, რომელიც არის უხარისხო, უვარგისი და არაფერს წარმოადგენს. რომლითაც არ დაინტერესებულა გამოძიება, რატომ იყო ბაჩალიაშვილის ჩანთაში. დანარჩენი 4 მედიკამენტიდან, მხოლოდ ერთზეა გამოტანილი დადგენილება, - ამბობს რამიშვილი.
ცნობისთვის, თამარ ბაჩალიაშვილი 2020 წლის 18 ივლისს გაუჩინარდა. 23 წლის პროგრამისტი
სათვალთვალო კამერებმა ბოლოს თეთრიწყაროს რაიონში დააფიქსირეს. რამდენიმედღიანი ძებნის შემდეგ, ის სწორედ თეთრიწყაროს ტყეში, საკუთარ მანქანაში გარდაცვლილი იპოვეს.
ექვსთვიანი გამოძიების შემდეგ საქმე დაიხურა და ბაჩალიაშვილის გარდაცვალების მიზეზად შოთაძის უწყებამ სუიციდი დაასახელა. ოჯახი და ადვოკატები კი დარწმუნებით ამბობენ, რომ ეს თვითმკვლელობით შეფუთული კარგად ორგანიზებული მკვლელობა იყო. მიზეზი კი გარკვეული ინფორმაცია გახდა, რომელიც პროგრამისტმა მოიპოვა და შემდეგ ის თავიდან მოიშორეს.
იხილეთ ასევე:
