ჩვენთან ერთად მოიპოვეთ თავისუფლება!
კასპის რაიონ სოფელ ახალქალაქში მოკლულია 50 წლის გიორგი გაბოძე. სოფელ ნოსტეში მცხოვრები მოკლულის ძმის შვილი და მათი მეზობელი კი დაჭრილია. მრავლობითი ჭრილობები მათ ცივი იარაღით მიაყენეს. გაბოძე ჰოსპიტალში მიყვანიდან 5 წუთში რეანიმაციულ განყოფილებაში გარდაიცვალა.
დაპირისპირება გვიან ღამით სოფლის ცენტრში მოხდა. ინციდენტი მაღაზიის სალაროსთან რიგის არ დათმობის გამო დაიწყო. ადგილობრივების ინფორმაციით დაპირისპირებაში სკოლის მოსწავლეებიც მონაწილეობდნენ.
გვიან ღამითვე შსს-მ სათვალთვალო კამერების ჩანაწერები ამოიღო, სადაც წესით უნდა ჩანდეს მომხდარის დეტალები.
მკვლელობასა და დაჭრაში ბრალდებული 26 წლის ლევან ხუციშვილია. ის დაპირისპირების შემდეგ მიიმალა და დაახლოებით 15 საათიანი ძებნის შემდეგ, კასპის ერთ-ერთ სოფელში დააკავეს.
დაკითხვების სერია პოლიციის განყოფილებაში მთელი დღის განმავლობაში მიმდინარეობდა. მოკლულის ოჯახის წევრების ინფორმაციით დაკითხვაზე იყო და ჩვენება მისცა მათივე ნათესავმა, ევსტატე გაბოძემაც. ის სისხლიანი დაპირისპირების ერთ-ერთი დაშავებულია.
გამოძიება სისხლის სამართლის კოდექსის 108-ე მუხლით მიმდინარეობს, რაც განზრახ მკვლელობას გულისხმობს. არ არის გამორიცხული ბრალდებულთა წრე გაიზარდოს.
